WILLEMSTAD, Kòrsou- Desèmber 2014; Djaluna atardi CEO di Banco di Caribe, sr. Fons Simon a risibí bishita di e tim di basketball, BdC Willemstad Warriors, ku a resultá e máksimo ganador den e último kampionato KJ Hoops. Na momento ku sr. Simon a risibí e kopa di e tim e’la ekspresá,” Esaki ta un satisfakshon grandi pa nos komo patrosinador, nos sá ku e kaminda pa éksito di e tim aki tabata unu di masha dedikashon i determinashon. Finalmente, awe nan ta kampion i nos ta orguyoso ku nan ta karga nos nòmber”. BdC Willemstad Warriors a kuminsá e trayekto pa éksito na 2011 i nan a praktiká kasi 1 aña promé ku nan a partisipá na un kampionato. Durante di e trayekto aki, nan a prepará físikamente i mentalmente pa e enkuentronan ku nan lo bai partisipá na dje. Na aña 2013, nan esfuersonan ta keda koroná ku e titulo di sub-kampion den kategoria U13.  E aña aki a sigui ku e trabounan ku algun hungadó nobo i nan a kompetí den e mes   kategoria ku e diferensia ku e biaha aki nan a logra e título máksimo. Banco di Caribe ta mira un futuro briante den Jurick Gustina, Justin Charles, Jaydon Hous, Gabriel Angel, Lisandro Anastasia i Jodahn Martina. Nan esfuerso i determinashon pa hiba nan ekipo na e título di kampion no por keda sin wòrdu suprayá.  “Nos ta regalá tur hungadó un Banco di Caribe MultiCard di USD 50,00 pa premia nan prestashon i komo un empuhe pa nan sigui duna resultado positivo”, asina sr. Fons Simon a kontinuá. Un pabien ta bai na tur entrenadó pa e tremendo trabou ku nan a bin ta hasi ku e muchanan. Ta tuma masha pasenshi i kariño pa guía un hóben na alkansá su potensial. “Nos tambe ta sinti un satisfakshon grandi, spesialmente ora ku mira ku trabou duru ta paga.  E muchanan a demostrá hopi kurashi i pashon pa wega, esaki nos por a konkluí ora ku den wega final, fanátikonan di e tim kontrali tabata apoyá i grita pa saka nan for di konsentrashon- asina mes, nan a lucha te final. Nos ta orguyoso di nan”, esaki di akuerdo ku e entrenadónan, Sr. Nimrod Thielman i Sr. Gerry Charles.