WILLEMSTAD- Desèmber 2013; Den luna di Òktober Banco di Caribe den koperashon ku  Curaçao Chess Academy (CCA) a duna inisio na proyekto pa duna lès di ahedres pa muchanan na Sentro di Bario Sta Maria i Sentro di Bario Montaña. E lès di ahedres ta brinda e muchanan konosementu general di e wega di ahedres den kombinashon ku saber spesífiko di nòmber i nifikashon di e piesanan, meskos tambe kon pa move e piesanan i kon pa plania e wega. E wega di Ahedres ta sirbi komo un forma pa sostené mucha den nan desaroyo di nan patronchi di pensa. Ademas di esaki e ta stimulá konsentrashon, pensamentu lógiko, promové independensia i motivá pa aktua ku disiplina. Ahedres ta yuda e mucha ku pensamentu di sobrebibensia, ora ku esaki ta nesesario usando tur abilidat optené e.o, traha ku ophetivo, pensa, ehekutá plan, konsiderá strategia, konsentrá i tene pasenshi. E muchanan por haña lès di Ahedres serka e instruktornan di Curaçao Chess Academy (CCA) na Sentro di Bario Sta. Maria di 10:00am te 12:00pm i na Sentro di Bario Montaña di 2:00pm pa 4:00pm. Banco di Caribe den su afan pa yuda stimulá i forma muchanan pa dia nan bira grandi nan por kontribuí positivamente na komunidat di Kòrsou a mira den e deporte aki un medio pa logra e meta spesífiko aki i ta masha orguyoso di por a uni huntu ku Curaçao Chess Academy (CCA) pa realisashon e proyekto.  Ademas di esaki Banco di Caribe ta mashá agradesido na tur esnan ku di un òf otro manera ta dediká nan tempu na desaroyo di nos hubentut. Resientemente direktor di Banco di Caribe, Sr. Dito de Kort a presensiá un seshon na sentro di bario Montaña kaminda por a mira e muchanan den akshon.