Tuma bon nota: Entrada temporal di banko lo ta na Kaya Almirante Pedro Luis Brion

KRALENDIJK- Sèptèmber 2013: Pa 26 aña Banco di Caribe ta miembro aktivo di komunidat boneriano. Den transkurso di añanan e banko a bin ta gosa di un simpatia grandi serka su klientenan. Esaki mes ta e motivashon pa semper keda ofresé nan e mihó servisio. Entrante djaluna awor lo kuminsá ku un trayekto di remodelashon. Relashoná ku esaki  tin algun kambio temporal ku klientenan mester tene kuenta kuné. “Kambio semper ta bon, sigur si e ta pa mantené un nivel haltu di satisfakshon serka kliente”, asina Sra. Ginia ElHage – Cicilia, mènèdjer di e filial di Banco di Caribe na Boneiru a komentá resientemente relashoná ku remodelashon di nan branch na Kaya Grandi. E entrada temporal pa klientenan di Banco di Caribe lo ta na Kaya Almirante Pedro Luis Brion i no na e entrada usual riba Kaya Grandi. E kambio aki lo drenta na vigor entrante djaluna 30 di Sèptèmber. Banco di Caribe lo hasi su máksimo esfuerso pa e trayekto di remodelashon transkurí mas lihé posibel. E trabounan di konstrukshon lo kuminsá dia promé di Òktober próksimo. Durante di remodelashon nos servisionan di transakshon na kaha ta keda desponibel. E servisionan di fiansa i hipoteka lo ta ubiká na di dos piso. “E kambio den nos branch ta nesesario pa por sigui duna e mesun bon servisio, pero den un esfera nobo..Nos ta pidi nos klientenan pa tuma bon nota di e kambio temporal i ta diskulpá pa kualkier inkumbiniensia”, asina Sra. Ginia El Hage – Cicilia a tèrminá.