WILLEMSTAD:- Djamars anochi na Rio Lounge Banco di Caribe tabata anfitrion di un ‘Meet and Greet the Champ’, esaki komo un reunion sosial di e profeshonalnan ku ta partisipando den e ‘King of the Caribbean’ (KOTC)  ku e aña aki ta selebrando su di10 aniversario. Huntu ku maneho di Banco di Caribe, den representashon di Sr. Dito de Kort e atletanan profeshonal a kombersá, sosialisá i kuminsá krea espektativa pa e kompetensia ku ta tumando lugá próksimamente. KOTC lo konta ku partisipantenan di Kòrsou, Aruba, Boneiru, Sint Maarten, Trinidad & Tobago, Jamaica, Mexico, Belgika, Inglatera, St. Lucia, Costa Rica , Venezuela i Hulanda. E evento di biar lo konta ku 4 dia konsekutivo di kompetensia na Rio Lounge & Sportsbar. Dia 2 di Novèmber próksimo lo konosé e ‘Rei di Biar di Karibe’ Na 2005, a tene e promé kompetensia di KOTC na American Business Center. Despues di algun aña di kompetensia eksitoso a amplia e lista di partisipante ku entre otro Trinidad & Tobago, Barbados, Venezuela, Sint Maarten i Hulanda. Ganadónan di e kompetensia di KOTC tin oportunidat di gana un total di $10.000,00 na premionan kèsh. Komo parti di selebrashon pa e 10 aña di KOTC a agregá un kategoria nobo na e kompetensia ku ta Curaçao Ten Ball Classic. Ganadónan di e kategoria aki lo tin oportunidat di gana un total di $25.000,00 na premionan kèsh. Lo tin partisipashon di hungadónan di biar profeshonal manera e mehikano Ruben Bautista, e ingles Danny Gohul, Serge Das for di Bèlgika, Wendy Jans, Alejandro Carvajal i Anthony Wever. Pa tur esnan ku ta deseá di mira e kompetensia di kategoria Ten Ball Classic; esaki lo tuma lugá te ku dia 2 di Novèmber próksimo na Rio Lounge & Sportsbar kuminsando for di 7’or di anochi. Banco di Caribe ta invitá fanatikonan di biar pa presensia e kompetensia. Ta deseá tur partisipante hopi éksito den e kompetensia di biar ‘King of the Caribbean’. Riba fotonan athuntu por haña un impreshon di e ‘Meet and Greet the Champ’ ku a tuma lugá djamars anochi na Rio Lounge & Sportsbar. Sr. Dito de Kort, managing director di Banco di Caribe tabata presente pa deseá tur ‘kampion’ hopi éksito den e kompetensia ku ta tumando lugá e siman aki na Kòrsou.