Bin apoyá e muchanan!

WILLEMSTAD- SEPT 2017:  E fin di siman aki ta tuma lugar e ‘Banco di Caribe Play & Stay Tennis Tournament’. Tur enkuentro lo ta riba kancha di Curaçao Sports Club (CSC) na Damacor. E entusiasmo ta grandi; mas di 50 mucha a registrá pa e fin di siman aki partisipá den e torneo. E kolaborashon di Banco di Caribe i Curaçao Tennis Foundation ta primeramente pa lanta mas interes pa tènis serka muchanan di entre 6 i 10 aña di edat i finalmente tambe pa motivá nan keda i desaroyá den e deporte. Banco di Caribe ta spera ku nan disfrutá di e weganan, i ta kòrda un i tur ku partisipashon ta mas importante ku gana. 

E torneo lo keda dividí den 3 kategoria; ‘red ball’ pa mucha entre 6 i 8 aña di edat, ‘orange ball’ pa mucha entre 8 i 10 aña di edat i ‘green ball’ pa mucha di 9 i 10 aña di edat. Weganan ta tuma lugar riba djabièrnè dia 29 di sèptèmber for di 14:00 pa 18:00 i riba djasabra dia 30 di sèptèmber for di 8’or di mainta te ku  16:00 na CSC, siguí mesora pa seremonia di premio.  Curaçao Tennis Foundation i Banco di Caribe ta invitá tur mayor pa presensia e weganan i apoyá e muchanan. No lubidá ku e yu ta partisipá ku mas smak, si e sá ku su mayor a bin apoy’é! Pa mas informashon di e torneo por tuma kontakto ku sr. Francis Hoyer na number di telefon 510-2645.