Partnership ku  Curaçao Tennis Foundation

WILLEMSTAD- SEPT 2017:  Banco di Caribe semper a duna sosten na proyektonan deportivo den kua formashon di e mucha òf hóben ta sentral. E biaha akí, Banco di Caribe ta kolaborá ku Curaçao Tennis Foundation pa organisá un torneo di tènis pa mucha di entre 6 i 10 aña di edat. E ‘Banco di Caribe Play & Stay Tennis Tournament’ lo tuma lugá riba djabièrnè 29 i djasabra 30 di sèptèmber próksimo na Curaçao Sports Club (CSC) na Damacor.

E torneo di tènis lo keda dividí den 3 kategoria; ‘red ball’ pa mucha entre 6 i 8 aña di edat, ‘orange ball’ pa mucha entre 8 i 10 aña di edat i finalmente ‘green ball’ pa mucha di 9 i 10 aña di edat. E intenshon tras di e ‘Banco di Caribe Play & Stay’ ta pa introdusí e muchanan na kompetensia di tènis. Torneonan manera esaki ta sirbi pa stimulá e mucha pa keda i sigui desaroyá den e deporte. Banco di Caribe ta invitá tur mayor pa registrá nan yunan di entre 6 i  10 aña di edat riba djabièrnè 22 di sèptèmber próksimo entre 5:30PM i 7PM na CSC. Kontribushon pa e registrashon lo ta únikamente 15 florin.

Ta importante pa no opstante tur e teknologia ku mundu ta ofresé, muchanan mantené un bida salú i aktivo. Ademas, deporte ta stimulá un aktitut positivo i ta yuda e mucha ku su disiplina, ta inspir’é perseveransia i ta dun’e un sentido di kompañerismo den deporte. Pa mas informashon di e torneo por tuma kontakto ku sr. Francis Hoyer na number di telefon 510-2645.