WILLEMSTAD – E gerensianan di Banco di Caribe i Sambil Curaçao a kaba di firma un konvenio pa e banko habri un filial den e sentro komersial ku pronto lo habri su portanan. Banco di Caribe ta entre e promé hürdónan ku lo ta kla pa sirbi su klientenan na Sambil. E filial di e banko lo brinda tur su produkto i servisionan na tantu e públiko ku ta bishitá e sentro komersial, komo e komersiantenan ku tin nan negoshi eiden. Ademas Banco di Caribe lo pone su servisio di ATM disponibel na diferente lugá den e kompleho grandi aki na Veeris. Pa seya e akuerdo aki, gerente general Jonathan Cohen di Sambil Curaçao a bishitá gerensia di Banco di Caribe enkabesá pa CEO i General Managing Director señor Fons Simon Na e enkuentro aki partidonan a reafirmá e konfiansa ku e koperashon aki dentro di poko lo duna fruta. Sambil ta kontentu ku un instituto finansiero prestigioso manera Banco di Caribe a tuma e paso aki di moda ku nan por brinda tur sorto di servisio bankario na e otro komersiantenan ku ta preparando nan pakus òf ofisina pa drenta e sentro komersial. Banco di Caribe mes dentro di poko lo kuminsá drecha su filial nobo ku ta situá pegá ku e aktual ofisina di benta di Sambil na e entrada prinsipal pariba. Riba potrèt, drpd CEO i General Manager Fons Simon di Banco di Caribe ta seya e konvenio ku Gerente General Jonathan Cohen di Sambil Curaçao.