Willemstad –MEI 2013: Banco di Caribe ta renobá su akuerdo di patrosinio ku tim di básketbòl Willemstad Warriors.  E tim ya kaba ta konosí bou di nan nòmber adoptivo ‘Banco di Caribe Warriors’. Durante di nan 20 aña di eksistensia e klup a logra un gran kantidat di título riba su nòmber.  Ademas di e éksitonan ku BdC Warriors tabata tin, nan a bin ta ekspandé nan éksito riba un nivel sosial tambe hasiendo diferente trabounan komunitario, esaki ta netamente loke ta hasi Banco di Caribe orguyoso. Di akuerdo ku maneho di e banko, patrosinio na kualke klup deportivo no ta inkluí solamente e sèn ku nan ta risibí, sino e envolvimentu di e organisashon den proyektonan sosial i di interes general. Den tiki palabra, e klup mester kompartí e vishon ku Banco di Caribe tin. Den transkurso di añanan BdC Warriors a krea no únikamente hungadónan ábil pa e deporte sino tambe mihó personanan den nos komunidat. E tim a ekspandé nan organisashon ku introdukshon di dos ekipo hubenil dividí den ekipo U13 damas i U13 kabayero, esaki ta pa kontribuí na e sistema pa kultivá hungadónan nobo. E patrosinio na BdC Warriors ta yuda e organisashon ku material di entrenamentu, pago di hür di fasilidat pa training, kompra di unifòrm i partisipashon na torneonan lokal i regional. Tabata djaluna último ku gerensia di Banco di Caribe a reuní ku direktiva di BdC Warriors pa ofisialisá e akuerdo di patrosinio. Pa e próksimo tres añanan e tim di Willemstad Warriors por konta ku sosten di Banco di Caribe. Sr. Ildefons Simon, CEO i General Managing Director di Banco di Caribe i Sr. Eduardo A. de Kort, Managing Director di Banco di Caribe ámbos a ekspresá di ta sumamente kontentu ku e prestashonnan di Willemstad Warriors. Sr. Gerry Charles, presidènt di Willemstad Warriors i Marc Lopes tesorero di e tim a gradisí e maneho di Banco di Caribe i un biaha mas a komprometé na ekselensia.