BETESDA, SGR-GROEP I KAS BRUDER PUIS TA BAI KONSIERTO “NUNKA ENTREGA”


KU YUDANSA DI DIFERENTE KOMPANIA I FUNDASHON

Willemstad – Un gesto uniko i bunita ku no sa sosode masha ta e echo ku kompanianan i/of fundashonnan ta yuda gruponan di nos hobennan, nos grandinan, personanan deshabilita ku ta kliente of habitante di un instituto i na mes momentu tambe Shamiro Anita p’e por sigui desaroya su musika kantando kantikanan positivo ku palabra di Dios.

Esaki ta loke a tuma luga na momentu ku ACOYA Hotel Suites & Villas, Japan NV/ Smart Home., Fundashon Bon Intenshon i CFSS a disidi di yuda un grupo grandi di habitantenan di Betesda i klientenan ku ta forma parti di SGR-Groep i Kas Bruder Puis pa nan por bai wak e konsierto & Show di Shamiro Anita, titulá “Nunka Entrega”.

ACOYA ta konosi pa su projektonan bunita i eksklusivo di apartementonan i Villa’s na Korsòu. Japan NV/Smart Home tambe ta hopi gusta i konosi pa su porta ku bentanan i tur kos pa kas ku negoshi di kalidat na bon preis. CFSS BV ta ofrese tur kos pa detekta i paga kandela automitikamente i kos di seguridat pa protege kas i negoshinan. Fundashon Bon Intenshon tambe ta konosi pa su bon intenshonnan hasi pa nos komunidat.

Varios ta e institutonan ku ta forma parti di SGR-Groep. Betesda ta e instituto ku ta kuida nos hendenan grandi ku dishabilidat i Kas Bruder Puis ta yuda nos hobennan.

Normalmente ta hopi difisil pa e personanan aki por bai presensia un konsierto di e magnitut aki sin yudansa finansiero. Ahinda ta buskando mas sponsors i/of donashon pa mas gruponan di mucha, hende grandi i personanan deshabilita por bai e konsierto.

E Gran Konsierto aki lo tuma luga djasabra 30 di semptember 2017 den International School kuminsando 7.30 di anochi. Ta trata di shownan espektakular pa henter famia disfrutá di dj’e. Lo tin diferente artista invita di Korsou, Venezuela i Sto. Domingo. Shamiro mes ta gradisi Dios na prome luga i ta manda un danki yena ku hopi bendishon na tur ku a i ta yudando. Ku yudansa di sponser i donashon e konsierto ta bira posibel i lo duna oportunidat na tur presente pa gradisi i alaba Dios den un ambiente bendishona. Karchinan ta bayendo lihe i ta obtenibel na Mensing, Tik Tak, Beep Beep, Kas di Beibel, 24 Uur Uit de Muur of via Tel 5622233. Preis di karchi solamente fl.35,–