WILLEMSTAD- Djabièrnè awó, dia 7 di ougùstùs Upgrade Music lo ta na Kòrsou pa un solo presentashon den Club Spoonz. Manera ya ta bon konosí e kantante prinsipal di e banda, Jonathan Thiel “Biggie Boy” resientemente a bai residensiá na Hulanda, na unda ku huntu ku ORI nan ta hasiendo diferente presentashon. Den fin di siman tras di lomba e banda kompletu, konsistiendo di 10 músiko a duna nan último presentashon na Aruba den The Sandbar. ‘The Last Upgrade’ a pèrkurá un biaha mas pa tremendo ambiente zonando tur nan hitnan. Djabièrnè awó lo no ta un eksepshon, Club Spoonz ta presentá un ambiente di gosadera total, na unda ku Upgrade Music lo zona éksitonan manera ‘Ainda’, ‘Someday’, ‘Miami’, ‘Cabaron’, ‘Everyday’, ‘Amor Cruel’ i muchu mas. Karchinan den pre-benta 25 florin ya kaba optenibel na Mensing Caminada, Beep Beep i Tak Tak. Pa reservashon den e área di VIP na Club Spoonz mester yama 5132841. E banda kompleto ta yega djabièrnè mainta Kòrsou, pa djabièrnè anochi ‘The Last Upgrade’ duna tur ku tin pa último biaha na Kòrsou.