CBW Ta Hasi Donashon di Bate

Komo organisadó di e Siman di Baseball (Curacao Baseball week), Blue Bay Curaçao Golf & Beach Resort a hasi donashon di kuater bate di beisbol nobo na ekipo di St. Michiel Sharks. E donashon aki a bira posibel danki na e entradanan ku a logra ku e vindishi tené na final di 2015. Ademas di e donashon na Sharks, Curaçao Baseball Development Foundation tambe ta risibi un suma pa kontribui den su operashon.

St. Michiel Sharks

‘Nos ta masha kontento ku e obsekio aki, di kuater (4) bate Demarini pa nos ekiponan di Little i Junior League ku a kaba di lanta”, asina Errol Cova a bisa na nomber di e organisashon. Ela agrega ku e kuater batenan lo tin un impulso masha positivo pa e kapasidat di bateo di e klup. “Nos tin kaba ku nos algun talento ku ta kantidato pa drenta den selekshon nashonal, apesar di e poko tempu ku e klupnan di nos ta eksisti. Esei ta priminti hopi pa futuro, e dirigente administrativo di e Tribonnan di St. Michiel a sigurá.’’

CBW

Vincent Zrour, enkargá ku e direkshon di e Siman di Beisbol ta rekorda ku for di e prome edishon a kuminsa ku aktividatnan pa rekouda fondo pa e komunidat lokal di beisbol. “E loke ta drenta na sen ku e aktividatnan aki produsi ta bai bek den sea produkto of servisio, den forma di donashon’’, e ta splika. ‘’Pa nos ta un plaser di por kontribui ku loke nos por, na benefisio di mihó desaroyo pa nos hobennan den e deporte, e ta afirma. Mas aleu e ta bisa ku Blue Bay tin masha respet pa e forma ku Sharks a sigura su eksistensha i ku mientras tantu nan ta hañando eksito ku desaroyo di talento. Nos ta konsidera tambe masha importante e komunikashon ku nos ta eksperensiando ku e fundashon pa desaroyo di e deporte di beisbol aki”, Zrour ta bisa mas aleu. E ta haña ku esey ta e miho base pa desaroya e aspekto hanchu di e deporte i desaroyo di tekniko i hungadonan talentoso ront Korsou.

E proksimo Curaçao Baseball Week ta tuma lugá di 25 di November pa 2 di Desember proksimo. E biaha aki e totalidat lo klousura ku un “Baseball Night” espektakular den Tio Daou Ball Park. Pronto e organisadó di e grandioso evento aki, Blue Bay, lo bai duna e detayenan di e loke Korsou ta bai eksperensha durante di e proksimo gran fiesta di beisbol aki.

Pa mas informashon tokante di Curaçao Baseball Week por wak riba: http://curacaobaseballweek.com & www.facebook.com/curacaobaseballweek.