Ku orguyo Blue Bay Curaçao i Maduro & Curiels’s Bank MCB, a entrega un chek na Excel Arts Academy (Boka Samíi) i Advent school na Juan Domingo. Durante di e torneonan di golf na Blue Bay den 2015 i 2016, a logra rekouda no menos ku 18 mil florin. E suma bunita aki a bira realidat danki na e hopi donashonnan ku partisipantenan a hasi, e suma di plaka destiná pa Robert-Jan Derksen komo ganador di MCB Curacao Masters i un aporte adishonal di Banko Maduro.

Seguro pa e Bus di Excel Arts Academy

E suma di F. 3000.- ku a keda rekouda durante di 2015 a bai pa Excel Arts Academy. Den un bon entendimiento ku e grupo artistiko aki a tuma e desishon pa usa e suma aki pa kubri e gastu di seguro pa e bus ku ta transporta miembronan di e grupo pa nan diferente presentashonan. Excel tin un bus pa basta tempu kaba pero komo ku no por a kubri e gastu di e seguro, no por a hasi uso di e bus pa transporte di nan miembronan. Awor si finalmente Excel por tuma e enkargo pa transporta su muchanan pa tur nan kompromisonan ku tur trankilidat.

Ekipo pa wega na Advent school Juan Domingo

“Si mi mester logra gana MCB Curacao Masters 2016 lo mi pone e suma destina na ganador na disposishon di e bon kousa ku e torneo a akorda: Advent school di Juan Domingo”, asina e eks hungador di e tour di golf di Europa, Robert-Jan Derksen (NL) a bisa. Wel su afirmashon a bira realidat. Derksen a regala e F. 9000.- ku komo ganador di MCB Curacao Masters e por a kobra, na e bon intenshon di e torneo. Algun golfista amateur a pone nan parti i Banko Maduro tambe a agrega, pa asina yega na e bunita suma fi 15 mil florin pa asina e skol por kumpra algun ekipo grandi pa e muchanan di e skol lo por entretené nan mes kuné. Advent school Juan Domingo aktualmente no tin ningun ekipo of aparato pa muchanan por usa pa hunga. Konsekuentemente nan tin urgensia pa logra ekipo i aparato pa e muchanan por diberti sanamente.