WILLEMSTAD – Siendo algu úniko na Kòrsou pa motibu di su lokashon estupendo i bahada di solo impreshonante, pa hopi aña kaba Blues bar & restaurant ta e “Hot Spot” pa Jazz riba nos isla, pero tambe e podio kaminda por skucha vários nòmber grandi den mundu di músika i artista tòp di Jazz i Blues. Entretantu músika i hasañanan kulinario a bira parti di kultura di Kòrsou, na kua Blues, komo esun ku ta marka pouta, tin añanan kaba ta duna un bunita kontribushon. Pa selebrashon di e di 25 hubileo di Blues restaurant di Avila, djabièrnè dia promé di desèmber e favoritonan aki riba tereno di, entre otro Jazz, lo presentá i, komo eksepshon, lo aktua huntu riba mesun anochi. Rekoudashon di e konsierto benéfiko aki lo bai pa stimulá talentonan hóben lokal riba tereno musikal i kultural, i p’esei lo bira un donashon na Sentro Kultural Kòrsou (CCC/Cultureel Centrum Curaçao).

Blues restaurant situá riba pir na Avila Beach Hotel, ta presentá ku entusiasmo i alegria apropiá e artistanan ku lo kontribuí na e grandioso konsierto aki: Hershel Rosario, Ronchi Matthew, Stanley Betrian, Tamara Nivillac, Evita Ross, Dennis Aalse, Arnell Salsbach, Chin Behilia, Edsel Juliet, Eric Calmes, Elbert Jozefa, Farley Lourens, Gedion Chandler, Gregory Colina, Hubert Martina, Igort Rivas, Irma Philbert, Kristel Rosario, Marlon Conradus, Meritza Haakmat, Mick de Boer, Ralph Durgaram, Redyson Zink, Wietze Krikke i Wendy-Jane Gomes ta poko di e nòmbernan ku lo engrandesé e anochi eksepshonal aki. Hershel Rosario i David “Ronchi” Matthew, famá i konosí internashonalmente, lo guia loke ta primintí di bira un konsierto kandente i un anochi eksepshonal.

Karchi di entrada pa “Blues 25” ta kosta US $25,- i ya ta optenibel na Avila Beach Hotel i na Mensing Caminada. Portanan ta habri 18.30, e konsierto ta kuminsá 19.30, i e ta kaba banda di 23.00.

Anekso: foto di Blues restaurant, Blues 25 aña logo & poster

– Fin di komunikado di prensa –