Pa training i desaroyo di trahadónan sosial di PWF

Willemstad –  En konekshon ku selebrashon di su 65 aña di eksistensia di Prinses Wilhelmina Fonds i alabes pa konmemorá “Luna di Konsientisashon riba Kanser na Pechu” Maduro & Curiel’s Bank a organisá un Awareness Happy Hour ameno pa tur kolega riba patio di Prinses Wilhelmina Fonds na Skalo. Direktor di MCB, Chicu Capriles, a para ketu na e trabou inkansabel ku PWF a bin ta hasi pa 65 aña i e relashon amistoso ku PWF i MCB tin pa años. Banda di esei Direktor di MCB a elogiá e tim di trahadó sosial di PWF ku ta hasi un tremendo trabou ora ta trata guia di e pashèntnan ku kanser. Kontinuamente tin desaroyonan nobo riba e tereno aki. Pa keda mehorá e servisio ku PWF ta dunando na su klientenan, mester invertí den konosementu di e trahadónan sosial. P’esei durante e  Awareness Happy Hour aki Chicu Capriles a hasi entrega di un chèk na balor di 65 mil florin ku e meta pa upgrade i desaroyá e tim di trahadó sosial di PWF. Despues di entrega di e chèk koleganan di Bo Banko Amigu a haña e oportunidat pa wak e eksposishon “Muhé Oudas”. E eksposishon interesante aki ta konsistí di potrètnan di hendenan muhé ku a pasa den un proseso difísil kirúrgiko, despues ku nan a wòrdu detektá ku kanser na pechu. E muhénan aki tabata dispuesto na kompartí esaki ku nos pueblo dor di para modelo i saka potrèt di nan pechu. E artista/fotógrafo ku a desaroyá e eksposishon “Muhé Oudas” ta señora Ellen Spijkstra.