Bon Biní na Kas ku MCB Ku bo hipotek di MCB bo ta sintibo na kas.


WILLEMSTAD – Maduro & Curiel’s Bank ta lansa konsepto di hipotek nobo: Bon Biní na kas.

Manera hopi di nos sa, bo kas mester ta bo hogar. Ta e lugá ku bo ta sintibo seif, kómodo i trankil. Pa hopi ta un soño pa nan tin nan propio hogar. Bo Banko Amigu ta sigui hasi su máksimo esfuerso pa trese esaki mas serka di’bo i hasié realidat. P’esei nos a lansa un konsepto den kual nos ta yudabo krea bo propio hogar i no djis finansiá un kas. E konsepto aki ta konsistí di paketenan spesial pa kompra di tereno i kas eksistente, pero tambe konstrukshon i renobashon di bibienda. Un hipotek di MCB ta duna posibilidat tambe pa konsolidá i invertí den un di dos kas.

Komo introdukshon di e kampaña nobo aki, Maduro & Curiel’s Bank ta introdusí diferente pakete di hipotek. E balor agregá ta ku e paketenan ta inkluí un interes sumamente atraktivo. Ta importante pa menshoná ku e interes aki lo ta na vigor te dia 31 di òktober 2017.

Djasabra último durante introdukshon di e konsepto Bon Biní na kas, sr. Michael de Sola, gerente di Maduro & Curiel’s Bank a dirigí palabra na un grupo di kliente i a konta su eksperensia en buska di su propio hogar. Tambe ela splika e sentimentu importante ku Banko ke pone atenshon n’e kual ta: Sinti bo mes Bon Biní na bo propio kas, pero tambe Bon Biní serka Bo Banko Amigu.

Di e manera aki, Bo Banko Amigu ta hasi e konsepto di Bon Biní na kas parti di un eksperensia agradabel i finansieramente aksesibel, pa esnan ku ta deseá di tin nan propio hogar.

Pa mas informashon por tuma kontakto ku un di nos ekspertonan di hipotek na 466-1111 pa un sita.