E wikènt tras di lomba e 7 beyesanan ku ta kompetiendo pa e korona di Miss Curaçao tabata di bishita na nos hermana isla Bonaire. Tabata un wikènt kaminda e kandidatanan a siña kompartí ku otro i alabes sera konosí ku Bonaire. For di nan yegada, nan a keda risibí pa sr. Angelo Domacasse di Tourism Corporation Bonaire i Miss Teen Hispanoamerica i Miss Young of the World, Energia Vision di Bonaire tambe a bin risibí e delegashon i mesora a tene un entrevista ku e beyesanan.
Divi Flamingo Beach Resort & Casino nos kas pa e wikènt aki, tabata asina entusiasmá ku nos bishita ku nan a organisá un Miss Curaçao Divi Flamingo rònt di nan South Pool. Nos beyesanan a duna 2 presentashon spontáneo i Sharline Alberto, kandidata # 7 a keda korona komo Miss Curaçao Divi Flamingo. E staf i pèrsonal a laga e kandidatanan sinti nan mes “Como toda una reina”. Durante Happy Hour na hotèl, direktor di TCB, sr Maurice Adriaans a bin sera konosí ku e kandidatanan i e la opsekiá kada un, 1 tas ku informashon di Bonaire, tambe e la kompartí informashonnan balioso di e desaroyo di último añanan na Bonaire.
E wikènt tabata kargá ku aktividatnan sumamente interesante, nos e keiru rònt Bonaire i a probechá di saka potrètnan masha bunita, na: Salt Company, Slave huts, 1000 steps, Gotomeer, Washington Slagbaai, Onima, Seru Largu i Donkey Sanctuary. Van den Tweel Bonaire tambe a invitá e kandidatanan pa bin disfrutá di un sabroso Smoothie, e sabornan ku nan por a skohe di dje tabata; Boerenkool, Strawberry, Kiwi i Pineapple.
Tambe nos beyesanan tabata tin e oportunidat di siña Windsurf ku nada ménos ku e kampion di Mundu Kiri Thode, esaki tabata un eksperensia inolvidabel pa kada un di e kandidatanan. E paseo di sorpresa pa Klein Bonaire, opsekio di Dive @ Divi Resort, kaminda nan a haña oportunidat di bai snòrkel tabata tremendo. E manera ku Bonaire a risibí nos 7 beyesanan a laga nan sinti nan mes na kas mesora i nan a disfrutá inmensamente di e trato ku nan a risibí unda ku nan a yega.
Un danki ta bai na tur ku a hasi e biahe aki posibel; Sr. Maurice Adriaans i Sr. Angelo Domaccase di TCB, Sra. Melissa Hilgers i Sra. Cynthia Winklaar di Divi Flamingo Beach Resort, Sra. Esmeralda Huerta, Energia Vision, Van den Tweel Bonaire, Kiri Thode Windsurf World champion. Jentis Tour, Restaurant Barrel, Karel’s Beach Bar, Sr. Serge de Groote di e Dive school na Divi Resort , Sra. Mercedes di Travel Traffic i VBK & Triple 7 ku a pone nos kandidatanan lusi mas aun. Coridja Stars Productions ta super orguyoso di por a realisá e fabuloso trep aki. Si bo ta deseá di sigui nos 7 beyesanan, bishita nos página di Facebook; Coridja Stars Productions.