Semper bo a deseá un hotèl, un resort òf un banko na Boneiru? For di 26 di novèmber esei ta posibel. Dor di hunga e wega original Bonaire Monopoly pronto bo por bira ‘doño’ di un kompania na Boneiru. Sea ta un hotèl, un resort, un banko òf un di e sitionan di buseo popular. Esei ta si, bo por ‘skapa’ e prizon. Djaweps último, sr. Edison Rijna, Gobernador di Boneiru a risibí e promé Bonaire Monopoly.

Bonaire Monopoly lo wòrdu hungá mundialmente

Identity Games International BV i e kompania Winning Moves, esnan lisensiá pa e popular wega di monopolio a krea e edishon aki pa Boneiru. “Tur pais, siudat of isla ta meresé su propio wega di monopolio,” di akuerdo ku Albert Meuter, fundador di Identity Games. “No ta únikamente nos di Identity Games ta entusiasmá ku esaki; e reakshonnan positivo di komunidat boneriano mes, tambe ta tremendo”.

Weganan edukativo pa tur skol básiko na Boneiru

E siman aki tur skol básiko na Boneiru lo risibí un pakete grátis di e wega edukativo aki. Den e pakete aki e muchanan lo haña e wega di Bonaire Monopoly, Happy Families i otro weganan edukativo mas ku ta yuda nan ku nan lesamentu, matemátika i tambe nan ingles.

Turistanan for di tur parti di mundu ta entusiasmá ku Bonaire Monopoly

E página di Facebook di Bonaire Monopoly ta mustra reakshon di turistanan i lokal. “Unda nos por kumpra e edishon aki?”, esaki ta un di e pregunta mas hasí riba ret sosial. E Bonaire Monopoly lo ta optenibel entrante 27 di novèmber na Addo’s Bookstore, Van der Tweel i Top1 Toy’s. Na Ulanda i sobrá parti di mundu por hasi pedido di e wega aki via www.thedushicompany.com. Pa mas informashon www.facebook.com/monopolybonaire