Diaranson dia 29 di Juli e grupo di 8 atleta di Brazil Taekwondo Stichting cu a bay bou guia di ex campeon mundial Henk Meijer a cuminsa cu nan prome training na Pung Saeng High School na Korea cu ta keda na Seongnam- Dong. E promer training a cuminsa pa 8’or di mainta y a bay te cu 10’or y mey den un sala pata pata di Koreano y algun atleta di Omman kendenan tambe a bay pa training hunto cu e Koreanonan.

E team a wordo presenta na e atletanan presente pa asina por a cuminsa cu e training. Pa 20 minuut largo tur hende mester a core den e sala na unda cu cada biaha e tempo tabata subi. Despues a sigui cu varios tecnica cu pilon cu a wordo poni 10 tras di otro haciendo varios ehercicionan sea bula of rondona e pilonnan. Pa completa e mainta a scop ariba e cusinchi grandi te ora cu e les di mainta caba y a sigui despues cu cooling down. Na final di e training Henk Meijer a wordo yama pa dilanti pa asina presenta e grupo di 8 atleta di Aruba kendenan a biaha pa Korea pa por tin e oportunidad pa train hunto cu nan. Despues e grupo di 8 atleta a train atardi for di 2’or y mey te cu 5’or na unda cu bringamento tabata mas central. E biaha aki tabata tin un grupo miltar cu tambe a bin train. Un sala mas grandi ainda na unda cu sigur e grupo di 8 atleta di Brazil Taekwondo Stichting a haya atencion di e Koreanonan. Mirando cu Aruba ta un isla asina chikito ta pone cu e atencion ta grandi cerca e Koreanonan. Henk Meijer kende ta ex campeon mundial ta keda un persona importante aki na Korea.

E team di Train Hard Fight Smart lo tin cu pensa pa cambia e lema pa Train Harder Fight Smarter den e dianan aki, pasobra training na Korea no ta nada facil, e tempo di training cu nan ta train, ta net un paso mas ariba cu esun di Brazil Taekwondo Stichting. Nos tin un caminda pa sigui pa asina nos por garantisa mas premio den futuro di Brazil Taekwondo Stichting.