Willemstad –  Building Depot a disidi di hasi un tremando gesto dor di regala tur e muchanan, hobennan i adultonan di Fundashon Kontakto di e grupo “Totolika” karchi pa bai e E Gran Konsierto di Shamiro Anita titula Kalme E Tormenta” ku lo tuma luga djasabra 8 di augustus 2015 den e Exhibition Hall di WTC. Ta trata di un kombinashon di konsierto shownan espektakular pa nan tambe lo bai disfrutá di dj’e.

Ta tiki kompania tin ku ta hasi gestonan uniko i bunita asina aki den kual ta yuda un grupo di personanan ku handikap mental i tambe un hoben ku ta kanta kantikanan ku mensahenan di Dios na mes momentu. E gesto aki ta mustra ku Building Depot tin kurason i bondat pa yuda e tipo di personanan aki tambe pa nan por bai bishita un luga manera WTC i gosa di un tremenda konsierto & Show. Building Depot ta konosi komo un dje miho kompanianan na Korsou kaminda por haña tur kos for di material di konstrukshon te ke muebles, aparatonan elektroniko i hopi mas. Dis pens’e i bo por hañ’e na Building Depot.

Fundashon  Kontakto ta e fundashon ku ta kuida i yuda personanan ku e asina yama “ Verstandelijke Handicap”.  Meta di e fundashon aki ta pa hasi tur loke ta den nan alkanse pa yuda personanan ku e tipo di hendikep aki pa nan tambe por haña e respet i posibilidat i posishon hustu den nos komunidat.

Shamiro ta yama danki na esnan a i ta dunando na aporte pa hasi e konsierto aki posibel i tambe na su sponsornan ku, entro otro UTS, Acoya Hotel, Howard Johnson Hotel,  Studio 8,  Building Depot, Refineria Isla, Japan N.V., Clarion Hotel, CFSS, Tramm Imaging i CBA. Karchinan ya ta obtenibel na Mensing, Tik Tak, Koko Loko, Beep Beep, Kas di Beibel i Kingdom Experience. Preis di karchi ta solamente fl.35,–

Riba e potret por mira representante di Building Depot sr. Rick Lucia ku a entrega e karchinan dje konsierto “Kalma E Tormenta” na e grupo “Totolika”, den kompania di Shamiro Anita.