Banda di Aruba ta gana Banda di Aña di Radio MAS 99, di corant Vigilante y skempi.com

ORANJESTAS , Aruba 23 december 2015 : Cu apenas un aña y mey di existencia, Buleria ta para den “top” di tur lista di exitonan pa 2015 y yegando fin di aña 2015 e yobida di reconocimento special a cuminsa cu premiacionnan di parti di Radio MAS 99 y corant Vigilante di Corsou y e website skempi.com di Hulanda. Den entrevista cu Dwight Leoneta y Jairo Evertsz, kende hunto cu Krish Mahtani y Rocco Flava ta dirigi Buleria, nan a expresa nan gratitud inmenso na tur e fannan y sostenedonan di Buleria pa e apoyo cu nan ta ricibiendo. Radio MAS 99 y corant Vigilante a scoge Buleria como e banda di exterior mas popular na Corsou. Riba e lista di Radio MAS entre otro tabata aparece tambe Oreo di Aruba y Nasty Play y Cache di Hulanda. Tur dos medio a midi e exitonan di e bandanan aki basa riba e acogida cu nan ta ricibi pa cu nan presentacionnan y nan exitonan na radio.

Skempi.com ta un website cu tin un data base hopi grandi cu musica di Caribe Hulandes y artistanan y bandanan cu ta presenta musica na Papiamento na Hulanda. Nan ta saca premio den cuater diferente genero di musica, incluyendo e banda mas popular, pa cual tabatin ocho banda den e top di popularidad cerca nan usuarionan. Segun Dwight Leoneta ta splica, aunke e no a wak e estadisticonan final ainda, Buleria a bay cu e di prome premio cu mas di un tercer di e total di votonan. E ultimo “number” cu Leoneta a wak tabata 38%. El a splica cu el a laga su yiu ricibi e premio pa e banda, como cu e tabata su prome dia di vakantie. Nunca Buleria a spera di gana un premio asina importante cu asina poco tempo di existencia, y tabata un momento hopi emocionante y di orguyo di por representa Aruba, briya y tin aprecio di asina hopi fanaticonan den exterior.

Tabata un momento hopi emocionante pa para wak di un distancia con su yiu a tuma e premio pa Buleria, Dwight Leoneta a bisa cu un sonrisa grandi. E competencia entre bandanan ta hopi fuerte y Buleria tin como enfoke mas produccion, mas exito. E aprecio di Buleria pa su fanaticonan ta sumamente grandi, y tanto Dwight como Jairo ta subraya e importancia di e aprecio y amistad, pero tambe e critica di nan fanaticonan, cu ta reconoce nan y ta biba e momentonan importante di lansamento di canticanan nobo, ora cu nan ta “score” un hit of un premio, y en general e momentonan importante di e banda hunto cu nan. Ken por a pensa cu un iniciativa cu a nace cerca Dwight Leoneta pa bin biba na Aruba tres aña pasa durante di Festival di Tumba na Boneiro lo a resulta den exito tras di exito? Jairo Evertsz ta splica cu e ta  trabao duro, y tur dia tin trabao y innovacion, tur dia ideanan ta drenta y tin idea pa sigui cu Buleria pa hopi aña mas.

E exito di Buleria ta sinta den su teamwork, con nan ta fiha nan metanan hunto, con nan ta adapta na otro y con nan ta combina tur idea pa yega unda cu nan kier ta. Tur hende ta pone meta y ta bay pa nan, “si nos gana, nos ta gana hunto y si nos perde, nos ta perde hunto tambe,”, Dwight ta expresa. Jairo ta splica cu tur cos ta cuminsa for di Aruba, cu e management team, cu Krish, Dwight, Rocco, Jason y su mes, nan ta forma un ekipo hopi stabiel y ta traha tur dia pa keda fiha den e mesun direccion y sigui reenforsa e stabilidad aki. E musiconan no ta solamente talentoso, pero ta personanan cu ta keda humilde y esaki e banda completo ta transmiti tambe. E musiconan tin un respet grandi pa nan fanaticonan y  ta habri pa critica di e fanaticonan y ta “deal” cu e critica na un forma cu ta resulta solamente den decisionnan cu ta beneficioso pa e banda y e fanaticonan.

E banda no tin  miedo di copia cosnan cu otro  artistanan ta haciendo, pero semper lo cambi’e y agrega nan “touch” y sabor special. E no ta un crimen pa copia otro, segun Dwight Leoneta. Nan no tin miedo tampoco pa otronan copia nan y en realidad ta aprecia ora cu otro artista imita nan, pasobra asina nan tambe ta sigui crece. E diferencia entre Buleria y otro bandanan ta cu entre nan mes nan ta sigui busca ideanan nobo y nan ta preocupa kico otro banda ta haci, pero ta wak den nan mes cas prome pa cosnan ta bon cerca nan mes. Buleria tin un bon seleccion di piesanan original y ta cla pa lansa nan album of “disco compacto” na 2016, pero tin plannan grandi pa lansa nan coleccion di musica riba un otro medio mas creativo, segun Jairo Evertsz ta splica.

Creatividad tin sigur den Buleria, esaki a wordo demostra caba, y e team completo ta “cla pa 2016”. Buleria ta cuminsa 2016 cu Carnaval, participando na e diferente festivalnan di musica na Aruba, como tambe na Corsou, unda semper nan a representa nos isla cu hopi zjeito y orguyo. Buleria ta e banda cu ta compaña Elite Empire Group.  Buleria ta desea tur hende un 2016 bendiciona! Cuida esunnan rond di bo cu ta stima bo; nan ta mantene bo rico na pensamento y rico na amor, Dwight Leoneta a conclui bisando.