WILLEMSTAD:  Tabata djaweps anochi ku staff i personal di C3 a selebrá apertura di nan ofisina nobo na Emmastad.  E edifisio a keda kompletamente renobá, modernisá i awor ta mas espasioso tambe.  Awor C3 tin su propio tayer na unda ku instalashon di aparatonan por tuma lugá, tambe a krea henter un hala tékniko for di kual por duna servisio na klientenan di C3. Sr. Bert Schreuders, direktor di C3 a gradisí e públiko grandi pa nan presensia durante un anochi asina importante. Huntu ku akshonista, Curaçao Growth Fund (Justus Martens i Erik Baas) a amplia riba e vishon pa futuro i e proyektonan riba kual C3 lo enfoká durante di e próksimo periodo.

C3 ta ofresé su servisionan na Kòrsou, Aruba, Sint Maarten, islanan BES i Anguilla- i tin nan propio red TETRA riba tur e islanan. Komo eksperto den komunikashon krítiko nan ta ofresé solushonnan pa diferente organisashon i empresanan ku ta aktivo den sektor di seguridat.  Ademas di esaki, C3 su ofisinanan resien establesé na  Colombia i Panamá-  pronto Repúblika Dominikana ta enfoká riba distribushon di produktonan di komunikashon i seguridat pa henter region.  E proyektonan ku ta wòrdu hasí for di e ofisinanan internashonal ta kontribuí na e mishon di C3, pa bira lider den region riba tereno di ‘Critical Communication’.

Ku 80 aña di eksistensia i ekspertisio, C3 ántes Zenitel ta komprometé pa sigui elevá nan servisio den 2018. Servisionan ku C3 ta ofresé ta indispensabel i ta inkluí komunikashon na momentu di kalamidat i situashonnan di emergensia na sitionan difísil. Esei ta e momentu ku únikamente e ret di TETRA di C3 por ofresé un komunikashon konfiabel i sigur.  Pronto lo finalisá e trabounan di aktualisashon riba C3 su ret TETRA ku lo pèrkurá pa aun mas mihó kobertura. Komo distribuidor outorisá di Motorola pa Caribe Hulandes e kompania lo ofresé e aplikashonnan di mas nobo ku tambe lo hasi e kombinashon di bos i data (LTE) posibel.  E aña aki C3 lo introdusí un departamentu dediká na Quality Assurance i sertifikashon ISO.