Kaba i kumisá aña ku Sunchi
Awe ta wordu estrená un kansion nobo di Ana Iria Nivillac ku ta hiba di tituló “Sunchi ta hasi bida mas dushi”. E piesa aki ku ta un “Salsa Brabu” i a wordu komponé pa Dudley Lucia i areglá pa Ike Jesurun.
Ike ta un musikó lokal ku ta konosí pa su virtuosidat. Den “e sunchi” aki nos lo por skucha na perkushon Pernell Saturnino ku ta un di nos gran maestronan di perkushon na Kòrsou. Tambe nos lo por disfrutá di e zonido di un “tres” ku a wordu toká pa Glen Camelia ku ta trese algu di e sabor di e son cubano.
Komo trompetista nos tin Igort Rivas, un cubano residensia na Kòrsou ku a nanse ku e tròmpèt na su boka. Komo trobonista Jorge Dobal residensia na Miami. Lo por skucha tantu un solo di “e tres” di Glen Camelia komo un solo di trompèt di Igort Rivas. Den koro di e piesa lo por skucha bos di e legendario Ompi Stefania ku tampoko no mester di niun klase di introdukshon. Tambe “Doble R” Rignald Recordino tabatin un kontribushon. Tekniko di studio ta Bert Sambo.
Dudley Lucia ku ta kompositor di e piesa aki no ta hopi konosi pa tur hende na Kòrsou den e ambiente aki. Sinembargo e tin 35 aña ta komponé. Den pasado ela yega di komponé tumba pa varios kantante renombrá den nos komunidat pa festival di tumba. Algún kansion komponé pa Dudley Lucia ku ta memorabel ta : “Para bo tende” Wini Poulo, (Montuno)” Mi a skohe mi rumbo “ Albertico Libie, (Montuno) “Klòknan di Pasku” I “Bin Kab’e akinan” Lady Rose (Wals i Tumba) “Pasku huntu kubo” Solange Camelia i Remsis Ignacia (Balada) “Mi ta habri aña kune” Ike Jesurun (Tambu) “Kòrsou, mi Kòrsou” Mistica Stefania (Tambu).