Willemstad – Djaweps mainta Minister Palm (Ministerio di Desaroyo Ekonómiko) i CEO di Curaçao Airport Partners Ralph Blanchard a desvelá  e borchi di informashon ‘Curaçao Mirador’. E momentu simbóliko a marka komienso di e trabounan di konstrukshon di e Mirador públiko nobo. Pronto komunidat di Kòrsou lo tin akseso na un Mirador mas safe, kómodo, ku un esfera plasentero. Tambe presente durante e desvelo tabata direktor di Curaçao Airport Holding (CAH) Maurice Adriaens i miembronan di Gerensha di Curaçao Airport Partners. E billboard ta duna un imagen di kon e futuro Mirador  lo bira. E Mirador nobo lo ta un area komodo i moderno ku hopi mas espasio pa sinta òf para disfrutá di e bista spektakular di avionan ku ta yega of bula bai, protekshon kontra solo, i mas lugá pa parker. E zona di Mirador lo tin un grandura di 335 meter kuadra. CAP ta invertí $300.000 den e Mirador. Durante di e trabounan di konstrukshon lo no tin akseso na e Mirador aktual. E trabounan lo dura te ku Mart 2015.