Willemstad – Curaçao Airport Partners tin komo prioridat prinsipal ofresé e biahero e mihó eksperensha posibel na aeropuerto. P’esei CAP ta informá tur biahero, ku na momentu ku esaki nota ku su maleta ta kibrá òf a wòrdu habrí, e por hasi su reklamo mes ora serka e Airline ku e la usa pa bula pa Kòrsou. Esaki, pasobra e Airline ta responsabel pa e maleta for di e momentu ku e biahero entregá esaki, te na e karusèl di ekipahe kaminda e biahero ta risibí su maleta bèk. Curaçao Airport Partners (CAP), kual ta e kompania privá ku ta operá aeropuerto di Kòrsou i ku ta invertí den mehorashon di servisio i fasilidatnan, ta komprondé ku ora un pasahero pasa den un situashon ferfelu, esaki por tin un influensia negativo riba e eksperensha di esaki na nos Pais. P’esei CAP, den su kontakto ku tur kompania i instansia envolví den operashon diario na aeropuerto, ta keda promové e importansha di e aktuashon i servisio ofresé na e biahero dor di tur 1500 empleado di e diferente kompania i instansia. CAP ta lamentá e eksperensha di mandatario señor Humphrey Davelaar. Den un kaso asina, e biahero por tuma kontakto ku e Airline i hasi su reklamo. Ora un persona kumpra un ticket, esaki ta parti di e palabrashon entre e biahero i e liña aéreo. E Airline ta sòru pa bienestar di e maleta te na momentu ku e maleta ta bek den poseshon di e biahero. Curaçao Airport Partners ta sòru pa e infrastruktura tei pa e trabou por wòrdu hasí. CAP ta monitor e servisio di tur kompania ku ta operá na aeropuerto p’asina, konhuntamente, ofresé e pasahero un nivel di servisio akseptabel òf yùist elevá esaki kaminda ta nesesario. Pa informashon tokante e prosedura di reklamo, e biahero por tuma kontakto ku e Airline. Curaçao Airport Partners ta mira e ròl di aeropuerto komo kara di Kòrsou komo granresponsabilidat i lo sigui promové elevashon di e ‘Airport Experience’ di e biahero lokal òf bishitante.