Willemstad – Espasio pa servisio di ‘shuttle’ pa carrental; un alokashon agradabel kaminda e biahero por warda riba e servisio di ‘shuttle’; i señal indikando e ruta pa e alokashon, ta algun di e kambionan den infrastruktura ku CAP ta dispuesto pa realisá, pa hasi e situashon di carrental no-outorisá mas kla pa tur esnan envolví, prinsipalmente e biahero. Den 2013 CAP a inisiá e prosedura legal kontra kompanianan ku, sin outorisashon, ta hasi uso di e tereno di aeropuerto pa hür nan outo. Aprel último, ora e sentensia interino a ser diktá, Korte a indiká di lo bishitá aeropuerto di Kòrsou pa haña un mihó bista di e situashon.  E siman aki representantenan di Korte a sinta na mesa ku Curaçao Airport Partners i kompanianan di carrental no-outorisá. Durante e reunion, ku a tuma lugá na aeropuerto, CAP a pone algun proposishon riba mesa kual ta hustu, ku bista riba e kompanianan carrental ku sí ta situá na aeropuerto i ta paga pa esaki, i na mes momentu pa akomodá e biahero ku ke hasi uso di e carrental situá pafó di e tereno. CAP a indiká ku, pa guia e aktividatnan di hürmentu di outo den bon direkshon,  mester kuminsá organisá e kompanianan ku ta hasi uso di e fasilidatnan na aeropuerto pa medio di un sistema di pèrmit. Segun CAP ta mas ku rasonabel ku kompanianan ku ta usa e fasilidatnan na aeropuerto pa uso komersial, paga un kompensashon mensual konforme e uso, i ademas CAP ta habrí pa risibí informashon ku lo por yuda hasi un kalkulashon adekuá. Ku e kompensashon CAP lo krea i mantené fasilidatnan pa e biahero por tin un eksperensha positivo ora e yega nos isla. Mehorá e eksperensha di e biahero Un di e proyektonan prinsipal di Curaçao Airport Partners (CAP) pa 2014 ta reorganisá e situashon di tráfiko na aeropuerto i ofresé e biahero i bishitante mas klaridat, p’asina mehorá e eksperensia di tur biahero na aeropuerto i promové un sintimentu positivo pa ku Kòrsou. P’e motibu ei e situashon aktual no por sigui permanesé, ya ku pa e bishitante ku no tin motibunan komersial, o sea e siudadano,  lo no sobra lugá pa parker, a konsekuensha di e kantidat di carrental no-outorisá ku ta okupá mas i mas lugá i ku sa okashoná situashonnan ferfelu den tráfiko na e área di Drop-Off. Ya CAP a tuma e inisiativa pa ofresé sierto kambio den infrastruktura pa logra ku tur aktividatnan di hürmentu di outo wòrdu sentralisá na un lugá, p’asina perkurá ku lo tin ménos molèster pa e pasahero ku ta sali for di tereno di aeropuerto ku otro tipo di transporte, durante e oranan mas drùk. Segun CAP esaki lo hasi e biahe mas kómodo i alabes promové e sintimentu di seguridat. CAP a invitá e representante legal di e kompanianan di carrental pa analisá e proposishon huntu ku e kompanianan, i pronto bolbe reuní ku CAP, pa huntu yega na palabrashonnan kla i hustu.