Durante Gran Apertura di terminal pa avion privá
Willemstad – Djaweps mainta a tuma lugá e Gran Apertura di Jet Centre Curaçao, kaminda CEO di Curaçao Airport Partners Ralph Blanchard a gradisí tur persona, kompania i organisashon ku a kolaborá i kooperá pa Jet Centre Curaçao por ta un realidat awe. Durante e seremonia Ralph Blanchard na nòmber di CAP a sorpresá Kapitan Gibbs (CATS) ku un plakat di rekonosementu ku lo keda ekshibí den Jet Centre Curaçao i huntu ku Minister Palm (Desaroyo Ekonómiko), Minister Navarro (Hustisia), Minister Jardim (Finansha) i Minister van der Horst (Maneho di Gobernashon, Planifikashon i Servisio Públiko), nan a inaugurá e fasilidat VIP pa avion privá.
“Mi ta sumamente kontentu ku apertura di Jet Center Curaçao, un edifisio bunita i moderno ku ta ofresé nos bishitantenan ku ta biaha den nan jet privá un espasio luhoso, privá, i ku servisio di ‘first class’. Jet Centre Curaçao sigur lo ta un estímulo pa nos por fungi komo un hub pa jetnan privá, pero tambe pa atraé mas bishitante komo turista. Pabien na Curaçao Airport Partners i na pueblo di Kòrsou”, tabata palabranan di Minister Stanley Palm (Ministerio di Desaroyo Ekonómiko) durante su spich na e gran apertura. Un gran kantidat di invitado i prensa a presenshá e inougurashon ofishal di Jet Centre Curaçao, siguí pa un rekorido dor di e edifisio p’asina haña un mihó impreshon di e servisio VIP ku ta ser ofresé na Kòrsou. Durante su spich CEO di CAP Ralph Blanchard tambe a duna un splikashon riba e importansha di e Jet Centre pa Kòrsou: “Partisipá na e segmento aki ta un manera adishonal ku kua nos por ekspandé e merkado aero i sistema di aviashon di Kòrsou ku mas kredibilidat. Konstruí i inougurá e JCC ta solamente e komienso. Awor nos mester dediká nos mes na optimlisá e ‘exposure’ di Kòrsou den e mundu di General Aviation, i proveé, huntu ku nos partnernan, e servisio mas mihó i kompetitivo ku nos por. Ta importante pa kapturá e segmento aki. Ta trata biaheronan eminente, pudiente, ku por tin un impakto ekonómikamente fuerte na Kòrsou, pues ku e servisio apropia nos por promové e rekonosementu pa Kòrsou den sirkulonan ekonómikamente haltu,” segun CEO Ralph Blanchard.
Rekonosementu Kapitan Gibbs
CEO Ralph Blanchard tambe a pone enfasis riba e importansha di e kolaborashon entre tur partner pa, huntu, yega na un servisio final ku ta eksitoso. “Hopi ta esnan ku a yuda implementá Jet Centre Curaçao i mi ta kere ku ta importante pa rekonosé nan esfuerso”, señor Blanchard a indiká. Durante su spich e la gradisí entre otro Minister Palm pa su sosten pa ku e esfuersonan di CAP, Minister Navarro i su tim di Imigrashon, Minister Jardim i su tim di Douana, Minister van der Horst pa su sosten, Hunta di CAP (representá durante e evento pa señor Eric Krul) ku a hasi e invershon den e fasilidat i a sostené e esfuersonan, Maurice Adriaens di Curaçao Airport Holding ku a sostené e inisiativa di General Aviation, Curoil, CATS i finalmente e tim di CAP i Jet Centre Curaçao ku ta operá e fasilidat.
Kapitan Gibbs di Curaçao Air Terminal Services (CATS) a risibí un gran sorpresa di Curaçao Airport Partners, ora CEO Ralph Blanchard a pidi’é pa bin dilanti pa e tuma nota di e plakat di rekonosementu ku lo wòrdu desvelá den Jet Centre Curaçao. Dor di presentá i desvelá e plakat na Jet Centre Curaçao, CAP ke hónra e gran trabou i esfuerso pa añanan largu di Kapitan Gibbs pa ku desaroyo di General Aviation na Kòrsou. Bou di gran aplouso Kapitan Gibbs a risibí e demonstrashon di honor i rekonosementu.
Jet Centre Curaçao ya ta miembro di ‘Air Elite’
Tambe Jet Centre Curaçao ya a haña rekonosementu internashonal: “Resientemente representantenan di World Fuel, e mayorista di kombustibel den mundu di aviashon, a bishitá e fasilidat. Esaki a resultá den akseptashon di Jet Centre Curaçao komo miembro den e prestigioso programa di FBO (Fixed-Based Operator) kual ta ‘Air Elite’. Esaki ni un luna despues ku nos ta operashonal”, CEO di Curaçao Airport Partners a splika. Di e miles di FBO na mundu tin solamente 35 den e kategoria ‘Air Elite’. Jet Centre awor tambe ta traha bou di e bandera aki, kual ta duna nos un plataforma di marketing ekstenso pa por merkadeá Jet Centre Curaçao i Kòrsou na e merkado global di biahe empresarial,” segun Ralph Blanchard. “Tambe nos ta miembro di ‘National Business Aviation Association (NBAA) i otro siman nos lo partisipá na e expo ‘NBAA Schedulers and Dispatchers’ ku un espasio den e sekshon di World Fuel, kual lo ta un ekselente spotlight pa Kòrsou”, segun Ralph Blanchard.
Invershon di $1.2 mion
Jet Centre Curaçao ta e promé terminal na Kòrsou dediká na ofresé un grupo spesífiko ku ta biaha pa i for di Kòrsou ku avion privá òf ‘corporate’, un eksperensha más luhoso i komodo. E fasilidat modèrno ta ofresé servisio eksklusivo di entre otro Imigrashon Douane, ‘General Aviation’, servisio di kombustibel, seguridat, fasilidat ultra moderno pa reuní, fasilidat pa piloto i hopi mas. Aktualment Kòrsou pa aña ta risibí aproksimadamente 3300 avion ‘corporate’ òf privá na Curaçao International Airport, pero ku e servisio pa medio di JCC por atraé un kantidat mas haltu. Curaçao Airport Partners a invertí $1.200.000 den realisashon di Jet Centre Curaçao.