Turistanan ta reakshoná enkantá ku dekorashon i muzik ‘Holiday Season’ na aeropuerto

Willemstad – For di e siman aki  biahero i bishitante na Aeropuerto di Kòrsou por disfrutá di un ambiente plasentero di dianan di fiesta ku muzik i dekorashon di Pasku. E siman di muzik a habri ku grupo di aguinaldo ‘Los Originales’ riba djarason i ta sigui ku koro Santa Famia riba djaweps i diferente otro presentashon durante siman. Turistanan a reakshoná hopi positivo i enkantá ku esaki i hopi ta esnan ku ta sakando potrèt di nan ‘Holiday Experience’ na aeropuerto. Curaçao Airport Partners (CAP) a dekorá terminal di Salida i di Yegada i tereno di parker den esfera di dianan di fiesta. Riba potrèt saká den e Terminal di Salida dekorá, por mira Customer Service Ambassador di CAP sra. Kimley Penniston, ku ta liderá e tim di servisio i sosten den tur Terminal na aeropuerto. Tambe tur bishitante por gosa di muzik di Pasku live di entre otro aguinaldo, koro di Pasku i muzik modèrno den tema di Pasku. Riba di dos potrèt por mira grupo di aguinaldo ‘Los Originales’ ku pa e presentashonnan speshal na aeropuerto a risibí uniform di Pasku di CAP. Te ku 23 di desèmber tambe lo tin presentashon di musikantenan Alex Montero, Igort Rivas, Kor Sta. Famia i  gruponan Los Originales i Los Paranderos.