Willemstad – Djarason Gerensha di Curaçao Airtport Partners (CAP) a tene e promé konsulta riba e tarifanan aeronautiko ku representantenan di kompanianan aereo i instanshanan (gubernamental) enkargá ku desaroyonan den mundu di aviashon. E reunion di karakter habrí i transparente ta e plataforma kaminda CAP ta informá su partnernan den aviashon riba e futuro proseso pa yega na proposishon pa tarifa pa e añanan ku ta bin i kaminda tur partner ta dialogá.

Reunionnan kaminda ta konsultá ku partnernan den mundu di aviashon ta parti di e prosedura pa yega na tarifanan ku ta regulá dor di Gobièrnu di Kòrsou. E siklo di tarifa ku ta wòrdu tratá ta pa e periodo 2016 te ku 2018. CAP, entre otro pa medio di asesornan eksterno, ta hasi investigashon i ta dialogá tokante su posibel proposishonnan ku e partnernan. Den luna di Mei lo reuni ku e partnernan atrobe i finalmente pa mas tardá 1 di Yüli CAP lo mester entregá su proposishon pa tarifanan nobo pe periodo 2016-2018 na Ministerio di Tráfiko, Transporte i Planifikashon Urbano i na e reguladó di tarífa Bureau Telecommunicatie en Post. Minister di Tráfiko, Transporte i Planifikashon Urbano ta tuma e desishon final, despues ku e reguladó analisá, aprobá òf posiblemente ahustá e proposishonnan. Delaster adaptashon di tarífa a tuma lugá den Desèmber 2012.

Durante e reunion CAP entre otro a duna indikashonnan masha preliminar tokante desaroyo di gastunan na aeropuerto i a duna un bista di e posibel haltura di tarifanan nobo. Tambe a dialogá preliminarmente tokante un posibel konsepto nobo pa introdusí un solo preis di PFC (Passenger Facility Charge/ antes konosí komo Airport Tax) pa tur biahero ku ta sali Kòrsou en bes di diferente tarifa pa buelonan internashonal i doméstiko. E benefisio di esaki lo ta ku e PFC International por baha konsiderablemente, kual lo stimulá turísmo. Tur lokual a diskutí durante e reunion finalmente mester wòrdu analisá i posibelmente ahustá pa e reguladó. E Minister di Tráfiko, Transporte i Planifikashon Urbano lo tuma e desishon final promé ku fin di aña.