WILLEMSTAD – E perservashon i kresementu di servisionan aereo eksistente ta di prinsipal importansha pa CAP  i pa desaroyo di turismo en general di Kòrsou. CAP ta lamentá e notisia ku InselAir a disidí di no kontinuá ku e servisio pa Charlotte entrante 19 di Yanüari 2016 pa motibunan relatá na prestashon finansiero ku tabata bou di e ekspektativanan pa loke ta trata e ruta riba kua sigur 70% di e biaheronan di InselAir for di Charlotte ta sigui pa destinashonnan ku no ta Kòrsou. Ta importante pa nota ku e servisio ku American Airlines (AA) lo inisiá for di Charlotte pa Kòrsou ta mas bien un adishon i no kompetensha pa e servisio di InselAir, ya ku kasi tur biahero di American Airlines for di Charlotte spesífikamente tin Kòrsou komo destinashon final.

CAP ta haña ku e introdukshon di e servisio di American Airlines for di Charlotte ku lo inisiá den luna di Desèmber riba un manera agresívo lo stimulá e tráfiko entre Kòrsou i e hub Merikano/Europeo krusial i lo kompensá e bashi den merkado kual lo resultá despues di e retiro di e servisio di InselAir.E adishon di American Airlines for di Charlotte ta riba e mesun liña ku e Master Plan di Turismo ku Kòrsou a adoptá resientemente, den kua ta indiká ku mester konsentrá riba e merkado Merikano komo un di e fuentenan importante di e futuro kresementu di turismo pa Kòrsou, kual ta un strategia ku ta risibí e sosten di CAP.

Lamentablemente, e status di Kòrsou komo ‘Kategoria 2’ ta stroba InselAir su ekspanshon di rutanan adishonal den merkado Merikano, loke no ta benifisiá e plannan di ekspanshon di nos kompania di aviashon lokal, i tampoko pa Kòrsou. CAP ta enkurashá i sostené e esfuersonan di Curaçao Civil Aviation Authority (CCAA) dediká na rápidamente sòru pa Kòrsou bolbe na e status di ‘Kategoria 1’, kual lo hasi posibel pa e kompania di aviashon lokal por eksplorá destinashonnan Merikano nobo.