Direktora di It’s Lit sra. Ashton Vicario: “Un soño ku mi tabatin pa hopi aña kaba a bira realidat”

Djaweps último Bar i Restorant “It’s Lit” a habri su portanan riba Caracasbaaiweg, pegá ku “Aquarian Pet Store”. E konsepto di e bar-restorant ta úniko den e área di Caracasbaai.  E kushina ta internashonal, pero ku un “touch” Venesolano. Shèfkòk sr. Carlos Luis Petit Petit ta di orígen Venesolano i huntu ku su Sous-chef sr. Senfried Martina e ta “run” e kushina di It’s Lit manera el a kustumá kuné ya pa vários aña kaba na su pais natal Venezuela.

Despues ku Pastoor Gerald Obispo a hiba algun palabra di bendishon djaweps último, sra. Ashton Vicario huntu ku algun persona hopi yegá na dje a hasi e apertura ofisial dor di korta e sinta ku tabatin, pa asina e invitadonan por a drenta i kana rònt den e restorant, ku aktualmente tin un kapasidat pa 50 persona sinta. Ainda mas tin lugá pa sigur 30 persona ku por sinta na e bar i disfrutá di diferente cocktail ku e bar ta ofresé.

Riba djabièrne lo bai tin dos (2) “Happy Hours” E promé ta di 5pm – 7pm i e di dos ta di 10pm – 11pm.

It’s Lit ta diferensiá su mes for di otro restorantnan na Kòrsou dor di entre otro e konsepto di sòpi riba djadumingu. Caracasbaaiweg ta konosí pa su mainta i mèrdianan druk riba djadumingu. Hopi ta esnan ku ta move den direkshon di e área di Jan Thiel of Caracas Bay pa landa of kore boto. Entrante e djadumingu aki bo por pasa promé na It’s Lit pa bebe sòpi (den èrko) despues sigui bo ruta pa Jan Thiel of Caracas Bay. Nos tur konosé esaki komo “Un sòpi pa drecha e kurpa”. Bo ta Bon Biní na It’s Lit!

Djaluna, Djamaras i Djarason portanan ta habrí di 3pm – 12am

Djaweps, Djabièrnè i Djasabra portanan ta habrí di 3pm – 1am

Djadumingu “Soup Day” portanan ta habrí di 8am – 3pm