WILLEMSTAD –  Djaweps i djabièrnè último un delegashon di Caribbean Development Bank (CDB) a bishita Kòrsou. E bishita di e delegashon tabatin komo meta sera konosí i pa duna informashon riba e posibilidatnan pa Kòrsou bira miembro di CDB i e servisionan ku CDB por ofresé Kòrsou den e futuro serkano. E delegashon de CDB tabata konsistí di Dr. Warren Smith, presidente di CDB, señora Yvette Lemonias Seale, visepresidente (Corporate Services) i señor Volville Forsythe, Assistant Bank Secretary. CDB kier ta e lider katalisadò di desaroyo pa rekursonan den e region di Karibe, ku ta traha na un manera efisiente, reaktivo i huntu ku su “Borrowing Member Countries“ i otro partnernan den desaroyo, pa ku e redukshon sistemátiko di pobresa pa medio di desaroyo sostenibel. E delegashon di CDB a sali St. Maarten djarason atardi kaminda nan a hiba kòmbersashonnan ku diferente instanshanan i personanan di interes. Na Kòrsou nan a hiba kòmbersashonnan ku e Project Management Team (PMT) di e Curaçao Development Finance Institute (CDFI) ku ta bai lanta próksimamente, ku e ministerio di Finansa, Kámara di Komersio, Korpodeko i OBNA. Tambe e delegashon a reuní ku e direktor di Directie Buitenlandse Betrekkingen. Djaweps a hiba un kombersashon ku Minister di Desaroyo Ekonómiko Sr. Stanley Palm. Den e kombersashon aki a papia di e posibilidatnan pa Kòrsou bira miembro di CDB kiko mester kumpli kuné pa bira miembro di CDB i kiko e bentahanan ta di ta miembro di CDB. Pa bira miembro di CDB mester ta miembro di Caricom. Kòrsou a apliká pa bira miembro asosiá di CARICOM i CDB ta dispuesto pa yuda pa e proseso bai mas lihé.

Djabièrnè atardi e bishita di trabou a klousurá i e delegashon a regresá Barbados djasabra mainta via Miami.