‘Cu aporte di Aruba Tourism Authority’

ORANJESTAD,– Falta solamente 10 siman pa e Endurance Festival di Challenge-Aruba cuminsa. Di 20 pa 23 di oktober Aruba lo ta den e esfera di un festival pa tur amante di deporte, en especial e deporte di Triathlon.

Na caminda pa Challenge-Aruba, organisacion ta percura pa promove e evento aki localmente pero tambe internacionalmente. Recientemente Challenge-Aruba hunto cu Aruba Tourism Authority tawata presente na dos expo na Merca cu tawata tin mas di 15000 bishitante. NYC y Boston Tri Expo ta expos caminda tin algo pa tur gusto, di esnan cu a caba di cuminsa train pa esnan avansa. Diferente booths cu productonan nobo, informacion y tur loke un persona mester sa di Triathlon. NYC Triathlon a conta cu 5000 atleta y Boston Triathlon a conta cu 1500 atleta. Challenge-Aruba a ricibi hopi entusiasmo for di bishitantenan di e expos pa e Endurance Festival cu lo tuma lugar na Aruba. Asina a rifa un 4 night stay pa dos adulto na Tamarijn Aruba All Inclusive na cada expo. Ademas a rifa participacion gratis na Challenge- Aruba 2016.

Como sponsor oficial di Boston Triathlon, Challenge-Aruba a forma parti di e goodie bag di diferente triathlon cu a tuma lugar na Boston como tambe a wordo menciona ariba diferente material di promocion.

E interes pa Challenge-Aruba ta halto y inscripcion pa loke ta trata atletanan internacional ta bayendo tremendo. Tawata un sentimento di orguyo pa wak cuanto bishitante di NYC y Boston Tri Expo a expresa di tin hopi interes den Challenge-Aruba. Ta premira cu Aruba lo ricibi mas o menos 1000 bishitante internacional cu lo tey na Aruba pa Challenge-Aruba.

Challenge-Aruba kier a recorda comunidad di Aruba cu lo no participa den e careda mes pero cu si ta desea di ta parti di e evento aki pa registra como voluntario. Un evento ariba e nivel profesional y e magnitud aki ta trece cu ne un organisacion estrecho pa asina sigura cu tur cos lo cana bon. Si abo kier forma parti di Challenge Aruba sin competi bo por sign up pa asina bira un voluntario. Como voluntario bo tin aceso na un experencia unico y lo ta ‘up close and personal’ cu un organisacion internacional cu participacion di triatletanan profesional. Esaki ta duna abo como un voluntario e oportunidad tambe pa socialisa bo mes.

Como muestra di aprecio tur voluntario lo ricibi un race shirt oficial como tambe articulonan ricibi for di sponsors. Un siman despues di Challenge Aruba lo tin un fiesta exclusivamente pa tur voluntario cual lo tuma lugar na Palm Island. Pa mas informacion di Challenge-Aruba like www.facebook.com/challenge-aruba