WILLEMSTAD – Djasabra 22 di Aprel, e Direktorado Nashonal ku ta responsabel pa e tareanan di kòntrol di Riesgo i Maneho pa Kalamidat huntu ku instansha nan ku ta
forma parti dje tim pa kombati kalamidat manera, Brandweer I Krus Kòrá a duna informashon na dirigentenan di e sentronan di bario afiliá na UNSEBAKO. E mainta a
konta ku bon asistensia di diferente di e lidernan di sentronan di bario afiliá na UNSEBAKO kual tabata tin diferente pregunta relashoná ku e temporada di Orkan
benidero. Durante di e charla, Sr. Lesley Fer, di Direktorado di Kòntrol di Riesgo i Maneho pa Kalamidat a duna splikashon relashoná ku preparashonnan pa e temporada
di Orkan ku ta start dia 01 di Yüni proksimo. Tambe Sr. Fer di forma ofisial a hasi entregá di e prome foyetonan di informashon ku e direktorado a emiti pa aña 2017 na
Sr. Sluis, presidente di UNSEBAKO.

E foyetonan aki ta e prome seri di foyetonan ku informashon tokante e diferente riesgonan ku por tuma luga na Korsou. E prome seri
aki ta kontene informashon relashoná ku riesgonan di orkan, tsunami òf tambe inundashon i kiko komunidat por hasi den e tipo di situashonnan aki. Mas aleu, Sr. Alfred Capello di Sèrvisio Meteórlogiko a duna informashon pa e temporada benidero relashoná ku tormenta nan tropikal, orkan I kon Meteo ta prepará
pa e temporada aki. Durante di e mainta, di parti di Brandweer Kòrsou, Sr. Dikmar Oleana a duna informashon di trabounan ku Kuerpo di Brandweer Kòrsou por tin
durante temporada di Orkan òf durante kualke yobida fuerte, mientras ku Sr. Marchena di Krus Kòrá a duna amplio splikashon kon kada suidadano por prepará su mes
debidamente pa e temporada di Orkan. Tambe e direktorado a enfatisá serka tur lidernan pa ampliá konosementu den e barionan dor di informá tur persona pa download e app di kalamidat den e diferente appstorenan, informa bo mes via e website www.kalamidat.cw , sigi e informashon atrabes di medianan social via e pagina di Facebook di Directie Risicobeheersing i esun di servisio Meteorogiko.