En conexion cu e siman di celebracion di ‘housekeeping’, diahuebs dia 17di september 2015 IBiSA a duna un charla riba salud pa e Departamento di Housekeeping di Amsterdam Manor Beach Resort. Gerencia a organisa diferente actividad pa e departamento, entre otro un charla di nutricion y actividad fisico. Durante e charla sra. Iraida Thijzen, a duna un splicacion di con pa scoge alimentacion mas saludabel. Kico mester tene cuenta cune ora di scoge y ora di prepara bo cuminda.  E foyeto di ‘Guia pa un Bida Saludabel’ ta duna un guia con pa come saludabel y haci actividad físico.

Den cuadra di esaki a papia tocante di e importancia di bebe 7-8 glas di awa pa dia. Banda di esaki a pone enfasis riba productonan cu ta menos procesa y cu ta mas mihor pa salud. Esaki kiermen cu fruta y berdura den su forma natural ta mas mihor. Por pasa cu bo no tin berdura of fruta fresco na man, na un momento asina lo por haci uzo di berdura/fruta frozen. Den e caso di fruta lo por uza fruta seco tambe, por ehempel rasenchi. E forma menos saludabel pa come berdura/fruta ta for di pot of bleki cu su contenido di salu/sucu ta halto. A menciona e importancia di pone atencion na e cantidad/porcion cu bo ta come di e diferente grupo di alimentacion. Tur cos bo por come, pero e mester ta na e midi corecto.

Dia 29 di september ta dia Mundial di Curason y a pone enfasis riba e factornan di riesgo pa haya e malesa aki cu ta: stress, huma, bebe alcohol di mas, presion halto, colesterol halto y poco actividad fisico. Por ultimo a duna 5 tips pa maneho di stress  y a parti diferente foyeto. Pa mas informacion por tuma contacto cu oficina di IBiSA na telefoon 5824987 of via email na ibisa.aruba@gmail.com .

Bishita IBiSA su Facebook y website pa mas tips y topico di un bida saludabel y movecion. Website : www.ibisaruba.org  –  Facebook : IBiSA.Aruba Pa mas informacion of pa un charla di alimentacion saludabel y actividad físico por tuma contacto cu IBiSA na tel 5284987.