Willemstad – Curaçao Airport Partners a finalisá e proyekto di ‘Air-conditioning Project’ pa Check-In hall di aeropuerto di Kòrsou. For di e siman aki biahero, bishitante, kliente i usuario por disfrutá di un área mas espasioso, fresku, kómodo i estetikamente mas atraktivo, kual mester elevá e eksperensha na aeropuerto, e kalidat di servisio i alabes kontribuí na un eksperensha positivo na Kòrsou. E reakshonnan di bishitante, tantu djaluna komo djamars, ya ta hopi positivo.

Riba 10 di Aprel 2014 CAP a kuminsá ku e proyekto ‘Airport Airconditioning’ pa e área di salida (Departures). E proyekto ta konsistí di dos fase kaminda mester a instalá èrko tantu den e área pa Check-In (fase 1), komo den e área di seguridat ariba (fase 2). Pa ofresé e usuario di e aeropuerto un esfera mas agradabel, CAP a ekspandé e área di Check-In ku 6 meter i a proveé esaki di mas freskura pa medio di un sistema nobo di èrko, i ademas e Check-In hall ta estetikamente mas bunita. Ophetivo prinsipal di e proyekto ta pa ofresé biahero, kliente i bishitante un ambiente mas espasioso, fresku i kómodo, kual lo elevá e eksperensha na aeropuerto, elevá e kalidat di servisio i tambe kontribuí na un eksperensha positivo na Kòrsou. Minister di Desaroyo Ekonómiko Stanley Palm, CEO di Curaçao Airport Partners Ralph Blanchard i direktor di kompania gubernamental Curaçao Airport Holding Maurice Adriaens, den presensia di Minister van der Horst (Maneho di Gobernashon, Planifikashon i Servisio Públiko) a  inougurá e área di Check-In di Curaçao International Airport. Durante e spichnan a para ketu na importansha di e proyekto aki i futuro desaroyo na aeropuerto. “There are ‘cool’ things happening at the airport”, CEO di Curaçao Airport Partners señor Ralph Blanchard a deklará durante su spich. Blanchard a referí na tantu e hecho ku e área pa Check-In awor tin èrko, komo e kantidat di proyekto ku lo wòrdu reaslisá e añanan aki. Desaroyonan sumamente positivo na aeropuerto, ku tin komo ophetivo pa pone aeropuerto di Kòrsou destaká den Karibe. “Regularmente CAP ta haña e pregunta ‘dikon nos a kuminsá ku e proyekto aki?’. Instalá e sistema di èrko ta un di e kondishonnan fundamental di e palabrashon entre CAP i Gobièrnu di Kòrsou, i CAP ta tene su mes na su palabrashonnan, ya ku esaki ta e base di un kolaborashon eksitoso entre partner“, CEO Ralph Blanchard (CAP) a splika durante su spich. Tambe a la elaborá riba e impakto ku e proyekto por tin pa Kòrsou: “Nos ta elevá e eksperensha i kalidat di servisio ku nos ta ofresé e bishitante i kliente; nos ta mehorá i hasi e fasilidat estetikamente mas bunita; nos ta establesé un bon relashon entre Gobièrnu i CAP; i finalmente, ku e desaroyonan aki, nos ke logra pa e orguyo i sentimentunan positivo di parti di Pueblo di Kòrsou pa ku aeropuerto, oumentá.
Diferente proyekto grandi na aeropuerto
Den 2014 Curaçao Airport Partners ta invertí 10 mion dòler den mehorashon di e eksperensia na aeropuerto. E proyektonan mas grandi pa 2014 ta; ofresé erko den área kaminda ta check-in, realisashon di un Mirador kómodo i safe, mihó infrastruktura pa asina ordená tur tipo di medio di transporte ku ta hasi uso di aeropuerto kual lo mehorá e eksperensha di e pasahero i un General Aviation Terminal pa ofresé e merkado di avionnan privá un mihó servisio i atraé mas kliente di e merkado aki pa Kòrsou. Tur esaki por kontribuí na fortalesé e merkado di turismo i ekonomia di Kòrsou.