WILLEMSTAD- Òktober – 2015- Marriott Resort Curaçao ta yama bon bini na Chef Celso Pinto komo parti di e resort su tim kulinario. Durante di su presensia Chef Celso Pinto lo guia staf i personal di kushina i kompartí su konosementu i eksperensianan. Huéspetnan di Marriott Resort Curaçao i bishitantenan lokal ku durante e dianan aki bishitá un di e restorantnan den e resort- Portofino ,Sea Breeze òf Emerld Lounge lo risibí un eksperensia kulinario inovativo riba un nivel internashonal.
Celso Pinto a kuminsá su karera kulinario den e kadena di hotèl Marriott. Na 1995 e’la profilá komo ‘production cook’, lider di kushina, supervisor i kabes di bankete na Marriott Resort Aruba & Stellaris Casino. Na desèmber 1999 Celso a bai traha na Marriott Hotel na Santiago, Chile komo ‘Sous Chef’. Na 2000 e’la wòrdu promové komo ‘Executive Sous Chef’ na Costa Do Sauipe Marriott Resort & Spa i Costa Do Sauipe Renaissance Resort Bahia, Brazil. Despues di a demostrá su abilidat kulinario Celso a wòrdu promové na desèmber 2002 komo ‘Executive Chef’ na Marriott Resort Panamá kaminda e’la traha te ku aprel 2008. No a dura muchu ku un oportunidat di promoshon a bolbe presentá i e biaha aki komo ‘Executive Chef’ di Marriott Resort San Juan & Stellaris Casino na Puerto Rico. Durante di añanan Celso a haña oportunidat di studia e arte kulinario di Aruba esaki a aportá grandemente na su konosementu i apresio pa diferente kultura i kustumbernan, por menshoná ku Celso ta dominá kushina di Amérika Latino, Brazilero, Italiano, Amerikano, Spañó, Asiátiko i hopi mas. Na mart 2014 ‘Executive Chef’ Celso Pinto a profilá na Sandals International Resorts na unda ku e’la kompartí añanan di eksperensia i ekspertisio. Marriott Resort Curaçao ta orguyoso di tin Chef Celso Pinto den su tim, kende lo train staf i personal riba tendensianan kulinario i yuda desaroyá talentonan lokal. Esaki pa prepará talentonan hóben pa un karera eksitante den e kadena hotelero di Marriott. Den transkurso di añanan Marriott Resort Curaçao a sá di brinda pueblo di Kòrsou i bishitantenan internashonal un bon servisio i un eksperiensia kulinario tur afó. Dor di agregá Chef Celso Pinto na e tim di Marriott Resort Curaçao ta spera di añadí un toke spesial na e produkto total ku e resort ta ofresé. Bon bini Chef Celso Pinto!