Diasabra 17 di December den Aruba Entertainment Center!
ORANJESTAD, Aruba – 20 di September 2016: Despues di 13 aña nan ta hunto bek! Esaki lo bira e concierto cu bo no por perde diasabra 17 di December den Aruba Entertainment Center Dakota: “Chicas Gaiteras, e re-encuentro, Divas in Concert”. E gran re-encuentro aki lo ta di 8:00pm te 12:00am y lo ta dedica na nos divanan di Caribe, Suramerica, Europa y nos divanan local! Cu otro palabra na esunnan cu di un manera of otro a influencia Chicas Gaiteras den e tipo di musica cu nan ta interpreta.
Chicas Gaiteras lo pone bo bay bek den tempo cu nan exitonan pero tambe algun di e hits di e divasnan aki. Nan ta bek pasobra boso a pidi p’e. E gran concierto ta den preparacion for di 2 aña pasa y e biaha aki kier presenta publico di Aruba un concierto nunca antes mira.
Ta trata di un solo concierto unda cu Chicas Gaiteras lo duna oportunidad na mas hopi fans cu ta posibel pa presencia e evento aki den un stadion cu lo ta yena cu hopi ambiente y recuerdonan masha bunita mes. Den pasado, Chicas Gaiteras a ricibi aplauso, muestranan di cariño y gradicimento y ta pa e motibo aki, cu Chicas Gaiteras kier a haci algo bek pa comunidad y esunnan cu tin e tarea dificil di conscientisa, educa y informa riba topiconan social.
No tabata facil pa por a reuni tur e integrantenan ya cu tur tin nan compromisonan familiar y profesional. A opta pa reuni cu integrantenan cu tabata forma parti di e grupo pa e ultimo 2 añanan di existencia di e grupo, mirando cu ta 60 integrante e grupo aki a conta cune durante su existencia. Pa complace peticion di un sin fin di fiel fanaticonan di Chicas Gaiteras , lo tin disponibel tur e CDnan di e exitonan cu nan a lansa for di comienso te ku awe, e anochi aki pa publico. Por haci reservacion for di awor caba na number di telefoon 660-8106 serca Fransisca Maduro y busca unicamente e anochi di e evento.
Asina ta ya bo sa! Bo ta cordialmente invita pa disfruta di e asina yama “Chicas Gaiteras, E Re-encuentro , Divas in Concert” . Diasabra 17 di December den Aruba Entertainment Center Dakota. Doorprizes , Bar y Cushina Bon Surti cu cuminda di Pasco. Un regalo caritativo lo ser entrega na instancianan caritativo di parti Chicas Gaiteras .Entrada ta Afl. 25-. VIP Afl. 50.- so y obtenibel ya kaba cerca algun integrante di grupo. Pa mas informacion por yama Irena Maduro na telefoon 568-3784 , Mirtha Maduro na 600-1967 , Gislene Semeleer na 593-6804 , Fransisca Maduro na 660-8106 of Marion Maduro na 563-2300. Tambe por Inbox nos riba nos Pagina di Facebook Chicas Gaiteras e Re- encuentro of na email : chicasgaiteras@gmail.com .No perde pasobra esaki lo ta e concierto cu tur hende ta wardando p’e!