WILLEMSTAD –  19 di Novèmber,2017-  CIBC FirstCaribbean a firma un akuerdo di patrosinio, resientemente, ku e klup di siklismo lokal Pedal Pushers Cycling Club. Esaki ta hasi posibel ku e klup di siklismo di Kòrsou akí, ku ta sumamente eksitoso, lo por aspirá pa metanan nobo i mas haltu pa e ekipo i pa e miembronan.  Komo parti di e akuerdo, e klup tin ünifòrm nobo ku e kolónan i e logo di e banko regional ariba. A hasi entrega ofisial di esakinan na e banko.

Pedal Pushers Cycling Club ta konsistí di 30 miembro. A lanta e klup na Aprel di 1974 ku e ophetivo pa promové siklismo bou di e miembresia i pa animá mas klup di siklismo na Kòrsou.  E klup tin un divishon di BMX tambe, pa hobennan entre 5 i 15 aña di edat. Pedal Pushers ta fokùs riba pustamentu i ta partisipá na un nivel di kompetensia haltu.

E klup a hasié kasi un tradishon di tin e tim di siklismo number unu na Kòrsou, basá riba puntonan di kompetensia akumulá serka e Curacaosche Wieler Bond. E klup ta organisá entrenamentunan anual den eksterior i ta partisipá tambe na kompetensianan di siklismo internashonal. “Nos ta kontentu di ta e spònser mayó di Pedal Pushers Cycling Club”, Lysaira Ortela, e Marketing Manager di CIBC FirstCaribbean na Kòrsou ta deklará. “Nos ta elogiá e klup pa su dedikashon na e deporte di siklismo. E ambishon ku nan ta demonstrá pa alkansá halturanan nobo kontinuamente, trahando duru, ta algu di gaba. Siguramente esaki lo kondusí na mas momentunan di gloria pa e klup, su miembronan, nos komunidat i, awor, pa nos banko komo nan spònser mayó orguyoso.”