Willemstad 24 di mei 2015- Pa CIBC FirstCaribbean, empleadonan ta un parti importantísimo den su esfuerso pa brinda su klientenan e mihó servisio bankario.  E banko pa e motibu aki rònt den region a introdusí un dia speshal kaminda ta duna apresio na su empleadonan.  Resientemente CIBC FirstCaribbean na Kòrsou a tene e dia aki i a homenegea varios empleado ku nan propio kolega a skohe pero tambe a hasi entrega di e Star Player Award Captains Choice Award.   Tur gerente i supervisor personalmente a yama danki na kada un di e empleadonan di CIBC FirstCaribbean durante un evento yena ku entusiasmo, animo i dinamismo ku a tuma lugá e mainta di e dia di apresio di empleadonan di CIBC FirstCaribbean na Kòrsou. E empleadonan kua e koleganan di CIBC FirstCaribbean mes a vota i skohe nan pa risibí un award tabata:

• Empleado mas kla pa yuda (Most Helpful Employee) a sali Sra. Jamilla Evertsz- Winklaar debi na su disponibilidat pa hasi mas ku ta rekerí di dje pa hasi un enkargo i komo un hende ku ta tuma inisiativa ku poko sosten di su superiornan;
• Empleado mas envolví (Most Engaging Employee) a sali Sra. Josephine Lugo komo un bon motivado, sotenedo, komprensivo i komo persona ku ta inspirá otro pa hasi nan trabou ku smak;
• Maria Harms, Sr. Carl-Henry Wolff i Sra. Jospehine Lugo a keda skohe komo e empleadonan riba kua  nan koleganan semper por konta kune (Most Reliable Employees). Tur ta persona ku semper tei i ku semper bo por konta ku nan ta realisá loke ta deseá di nan;
• Empleado mas amabel i plasentero (Most Fun Employee) a resultá Sr. Javier Kalvenhoven;
• Miéntras a empleado ku mas tin e espíritu i aktitut di lider (Most Outstanding Team Runner) a resulta Sra. Heidi Getrouw kende den trabou kontinuamente ta mustra koleganan riba e banda positivo i ta enkurashá nan pa realisá tareanan ku na promé instante ta parse difisil.

Banda e empleadonan aki, ku a keda skohe pa na propio koleganan, a hasi entrega tambe di e Star Player Award na Sra Giandra Jamanika-Winklaar i Sr. Elfried Martina pa nan aporte inkondishonal den realisa CIBC FirstCaribbean su fasilidat di Platinum Banking. Sra. Lysaira Ortela, Sra. Dinayda Bronswinkel i Sr. Stephen Phelipa a risibí e Captains Choice Award pa nan liderazgo i realisashon di proyektonan di e banko. Premiashon i gratitut na empleadonan a tuma luga durante di un mainta kaminda klaramente por a tuma nota di e espíritu positivo i entusiasmo ku tin den CIBC FirstCaribbean pa traha dediká na brinda mas i mihó servisio bankario.