Willemstad – 5 di Novèmber 2014 CIBC FirstCaribbean a enkurashá e espíritu inovativo i kompetitivo di nos hóbennan dor di patrosiná e 2ndo edishon di kareda di garoshi di palu organisá pa Fundashon Museo Tula ku a tuma lugá djadumingu último.  Studiantenan entre 10 aña i 13 i 14 aña pa 16 aña di e skolnan Kolegio Don Sarto, Ala Blancaschool, Kolegio San Jose, Annie Koenraad, F.O. Sheila Karel/ Elis Juliana i AGO Jozef Civilis a partisipá den e kompetensha aki.  F.O. Sheila Karel/ Elis Juliana a gana e kompetensha di e garoshi más original i tambe a sali e ganadó máksimo di e kompetensha. Esaki ta e di dos biaha ku Fundashon Museo Tula ta organisá e kompetensha di garoshi aki.  Kada skol por a partisipá ku dos garoshi, ku nan a traha aña pasa, i dos garoshi nobo. E studiantenan a kuminsá prepará nan garoshi di palu for di kuminsamentu di luna pasa. E kompetensha a tuma lugá na Seru Molina banda di Barber. Un grupo di trahadó di garoshi di palu ku amplio eksperensha a fungi komo hurado.  E evento ku a tuma lugá durante henter dia, a konosé vários momentu eksitante. “ CIBC FirstCaribbean ta aploudí e inisiativa di Fundashoin Museo Tula pa interesá hóbennan den traha i kompetí ku garoshinan di palu tradishonal.  E proseso di traha huntu den tim riba un proyekto ta siña e hóbennan na un edat yòn pa traha huntu i apresiá kada un su abilidat miéntras nan ta koperá ku otro.  E ta tambe un manera ideal pa tene un tradishon ku nos tur a gosa di dje den nos hubentut bibu.  Nos ta felisitá e ganadónan i ta enkurashá e otro timnan pa kuminsá prepará trempan pa e kompetensha di otro aña”  asina Lysaira Ortela, Marketing Manager di CIBC FirstCaribbean a bisa. Awe e partisipantenan na e kompetensha di e aña aki, no muchu despues ku e stòf i animashon di e públiko a kalma, ya ta analisando nan prestashon i a kuminsá planifiká kon nan por presta aun mas mihó den e kompetensha di garoshi di otro aña.