WILLEMSTAD- 1 di yüli 2014: Durante di un rueda di prensa ku a tuma lugá resientemente na Panama a anunsiá un kampaña promoshonal den kuadro di ‘Curaçao North Sea Jazz Festival’ (CNSJF) ku ta tuma lugá dia 29 i 30 di ougùstùs próksimo. E kampaña ta enserá un konkurso kaminda e ganador huntu ku un persona ta haña e chèns pa bishita nos dushi isla Kòrsou i asina asistí na e festival di músika internashonal, CNSJF. Pa partisipá e usuario mester bai riba e wepsait www.curacaoesposible.com yena su datonan personal i kontesta e pregunta: Nombra 3 artista ku ta partisipá na CNSJF. Kontestando e pregunta aki outomátikamente e persona ta partisipando den e kampaña. E kampaña ta kore te ku dia 8 di ougùstùs 2014. Tur e kontestanan korekto ta bai den un tómbola for di kua lo saka e ganador dia 13 di ougùstùs próksimo. E premio ta enserá 2 tíket pa Kòrsou via Panamá, 2 entrada pa CNSJF, akomodashon pa 2 persona pa kuater dia i tres anochi, transporte di hotèl pa aeropuerto i pa e evento di CNSJF. E kampaña ta bálido den algun di e paisnan kaminda Copa Airlines ta ópera kual ta: Panamá, Brasil, Colombia i Mexico. Pa Copa Airlines e evento di CNSJF a konsolidá su mes den un di e mihó festivalnan di músika di mundu tantu pa su organisashon ekselente i e kalidat di e artistanan ku tur aña ta forma parti di e evento. Pa e motibu aki nan ta rekomendá nan pasaheronan i públiko en general pa konosé mas di evento CNSJF i di e destinashon turístiko ekselente ku Kòrsou ta. Ta bon pa menshoná ku esaki no ta promé biaha ku CTB i Copa Airlines ta lansa un kampaña huntu ya ku e último añanan na diferente okashon a traha huntu den promoshon di Kòrsou. For di yüni 2012 Kòrsou ta forma parti di e destinashonnan di Copa Airlines ku buelonan riba tur djamars, djaweps, djasabra i djadumingu.