Djadumingu 24 di yüli den e Conference room di Sambil, Prensa a sera konosí ku e 7 kandidatanan ku lo bai pa e sertámen di Miss Curaçao 2016. Mester bisa ku e atardi tabata unu masha ameno, públiko tabata ansioso pa sa ken ta e kandidatanan ku lo bai kompetí, pa sa ken lo bai ta e susesora di Kanisha Sluis. Despues di e éksito di Kanisha Sluis na Miss Universe 2015, Coridja Stars tin un reto su dilanti pa logra trese e korona di Miss Universo 2016 Kòrsou.
Na komienso di e atardi, sra. Anatefca Isenia-Djaoen direktora di Miss Curaçao a presentá e team di Coridja Stars ku konhuntamente ku e kandidatanan ta den ful preparashon pa brinda nos pueblo e lokual nan a kustumbrá kuné di e magno evento aki.
E skema di preparashon di kandidatanan ta sumamente intensivo, nan lo keda prepará riba diferente tereno ku ta importante pa nan desaroyo pèrsonal. Tambe a anunsiá tur e diferente eventonan den kual e kandidatanan lo bai kompetí, pa asina demostrá dikon e lo mester keda korona komo Miss Curaçao 2016.
E promé evento lo bai ta; Miss Playa, djadumingu 21 di ougùstùs 2016, di 17:00 pa 20:00 na Floris Suites Hotel, entrada Fls. 35.00 pp. E segundo evento lo bai ta; Best National Costume, djasabra 10 di sèptèmber 2016, di 19:30 pa 21:30, Curaçao Marriott Hotel, entrada $50.00 pp.
I sertámen Miss Curaçao 2016, djadumingu 2 di òktober 2016, di 20:00- 23:00, na Santa Barbara Beach & Golf Resort, entrada Fls. 150.00 pp.
Karchi di entrada pa tur nos eventonan ta optenibel serka e kandidatanan i na ofisina di Coridja Stars Productions. Coridja Stars Productions kier gradisí un i tur ku ta kere den nos organisashon i a duna nan sostèn i koperashon. Esakinan ta; Curaçao Tourist Board, Mac Duggal, Diamond International Corporation, UTS, Sambil, VBK & Triple 7, Penha, Onix, Ackerman, Flowershop Obelysque, Floris Suites Hotel, Tramm Imaging, Curaçao Marriott Hotel, Salvador Peluqueria, Cafe Barista, Body Beach Wellness Club, Medical Laboratory Services, Dental Clinic Suffisant, Santa Barbara Beach & Golf Resort, Caprichos de Mujer, Multipost, Top Professional Cleaning, Cinemark, Punto Blanco, D’Art, Help’r, Anoutcka Koolman-Burleson, Soul Spa & Salon, Alicia Barros Penate Altacosturera Aruba, Shari Wax Salon, Oost West Car Rental, Franky’s Chairs & Tables Rental, Carlos Djaoen, Omni i Sound & Vision.
Despues di a kompartí e informashonnan aki, a yega e momentu tan spera, presentashon di e kandidatanan i nan instalashon ofisial. D’Art a habri e segmentu aki ku un tremendo presentashon manera ta kustumbrá di nan. Despues kada partisipante a subi esenario pa presentá nan mes. Nan tabata lusi un unifòrm di tela batik obtenibel na Ackerman, kada un ku un modelo diferente ku a aksentuá nan personalidat. Despues di nan presentashon, direktora di Miss Curaçao, sra. Anatefca Isenia-Djaoen a subi esenario ku algun tambú na miniatura, ku tabata tin number pegá, e kandidatanan mester a skohe unu pa determiná, e sekuensia ku kual nan lo partisipá na e diferente eventonan i nochi final.
Kandidatanan Miss Curaçao 2016; Sharline Alberto, Nashaira Balentien, Liane Bonofacia, Samantha Janga, Chanelle de Lau, Kim Martina i Sabrina Namias de Crasto
E kandidatanan ta hopi entusiasmá i nan ta dunando lo máksimo pa garantisá ku e temporada di Miss Curaçao 2016 lo bai ta eksitoso un biaha mas. Awe tambe nos ta lansa e página di Facebook di kada kandidata individual, asina uni i tur por sigui nan i tambe duna nan e apoyo pa logra nan meta, ser koroná komo e máksimo embahadora di beyesa di Kòrsou. Manera aña pasa e lema di Miss Curaçao ta: Beyesa, muchu mas ku loke bista por alkansá!
Keda pendiente pa mas informashon durante e temporada ku ta bini. Pa informashon adishonal por tuma kontakto ku ofisina di Coridja Stars Productions na tel: 461-3352. Subi nos Facebook page: Coridja Stars Productions òf koreo elektróniko misscuracao@live.com.