algun otro bario mas lo sigui pronto komo parti di e proyekto piloto aki

Willemstad-  Kòrsou no ta keda atras den mundu pa loke ta servisio postal.  Cpost International (Cpost) ta introdusí Kòrsou ku e konsepto di Community Mailbox. Ta trata di un sentralisashon di pòstbùsnan na sitionan sentral den nos barionan. E barionan di Emmastad, Kwartier i besindario lo ta e promé barionan piloto kaminda lo introdusí e konsepto nobo i moderno aki. E realidat di bahada di kantidat di karta físiko den mundu ta obligá servisionan postal di buska solushonnan kreativo i alternativonan ku ta keda benefisiá e kliente i ta garantis’é ku su pòst ta wòrdu entregá rápido i sigur.  Ku introdukshon di Community Mailbox (CBox) na Kòrsou, Cpost un biaha mas ta dal un paso pa keda nos kompania postal ku ta trese inovashon ku a proba su mes den mundu i ku ta faktibel i duradero.  Entrante 1 di yanuari 2014, e habitantenan di e barionan di Emmastad, Groot Kwartier i besindario lo por rekohé nan karta na e Community Mailboxnan (Cboxnan) na Pòstkantor Groot Kwartier. Dianan 26 i 27 di novèmber, e habitantenan ku a risibí nan invitashon na kas por pasa entre 6 pa 9 or di anochi tuma informashon i nan yabi di mailbox na Postkantoor Grootkwartier.   E servisio di Community Mailbox ta kompletamente grátis. Na Kòrsou, meskos ku den gran parti di mundu, e kantidat di kartanan físiko ta bahando drástikamente miéntras ku e kantidat di adrèsnan ta keda oumentá. Cpost ta nos kompania postal ku a bin ta introdusí servisio i produktonan nobo ku ta pas den e tempu moderno aki.  Asina C-Post a introdusí su servisio di PuntoMio i a kombertí ofisina postal di Punda i Otrobanda den un berdadero sentro atraktivo kaminda bo por akudí mas ku simplemente pa atendé bo servisionan postal.    Introdukshon di Community Mailbox ta pas netamente den e desaroyo aki.  Community Mailbox ta un konsepto introdusí no únikamente na paisnan mas grandi manera Canada pero tambe introdusí pa otro servisionan postal den Karibe manera BVI Pòst, Turks & Caicos Pòst, Jamaica Pòst i Barbados Pòst.  Algun di nan a introdusí esaki pa mas di 8 pa 9 aña kaba.  Cpost a tuma tempu pa studiá e eksperensha na e paisnan aki pa asina por introdusí e konsepto di Community Mailbox na Kòrsou. E Community Mailboxnan ta traha di un material duradero i ta poné na un lugá kumbiniente. Den kaso di e barionan di Emmastad, Kwartier i besindario esaki ta situá na e ofisina di Cpost na Groot Kwartier. E boxnan ta ankra riba un base fuerte pero ta permití sierto grado di moveshon.  Uso di e Community Mailbox ta simpel.  Kada adrès ta haña un mailbox.  Kada mailbox individual tin un yabi úniko.  Pues kada yabi por habri solamente un mailbox.  Di djaluna pa djabièrnè Cpost ta deponé e pòst un biaha pa dia den e community mailboxnan.  Pronto Cpost lo intrdusí un sistema kaminda kada persona ta keda notifikávia sea e-mail òf sms via telefòn na momentu ku hinka pòst den su CBox.  Un persona di e kas i/of adrès ku e community mailbox ta pertenesé n’e por pasa na e momento ku ta mas kubiniente pa su persona i kolektá su pòst den tur su komodidat. E persona por opta tambe pa rekohé su pòst riba sierto dia so.  E kartanan lo keda warda na un manera sigur den e community mailbox.  Den kaso ku bo risibí un pakete ku no ta pas den e community mailbox, bo ta risibí un notifikashon por eskrito pa bo pasa tum’é na un ofisina di Cpost.  Bal enfatisá atrobe ku e servisio di Cbox ta kompletamente grátis. Komo e promé barionan de e proyekto piloto aki  a skohe Emmastad, Groot Kwartier i besindario.  Dianan 26 i 27 di novèmber próksimo lo  entregá yabi di e community mailboxnan na e habitantenan konserní.  Habitantenan  ku ta bini na remarke pa risibí un community mailbox, mientrastantu a risibí un invitashon por eskrito pa pasa sea dia 26 òf 27 di novèmber próksimo entre 6 pa 9 or di anochi na Postkantoor Grootkwartier.  Lo tin oportunidat pa tuma yabi di bo mailbox i tambe haña informashon.  Pa por risibí e yabi mester bin ku un identifikashon bálido (pasport, reibeweis òf sédula) di e persona ku ta inskribí na e adrès, dos resibu resien di Aqualectra of dos di UTS.  Den kaso ku bo no tin un di esakinan porfabor bin ku e últimodos statement di banko ku riba dje e adrès indiká.  Den kaso ku un persona no por asistí pa tuma su yabi e por apoderá un persona pa hasi esaki pe ku un karta di apoderashon.  E persona enkuestion mester bin ku  identifikashon bálido di tantu di su mes komo e persona ku a apoder’é plùs e dokumentunan indiká mas ariba.  Pa mas informashon por tuma kontakto ku Departamentu di Servisio na Kliente na telefòn 433-1372, 433-1365, 433-1380 òf 433-1138. Por manda un e-mail na customerservice@cpostint.com.