WILLEMSTAD- 30 di yüni 2014: Durante di kuater dia largu Ofisina di Turismo di Kòrsou (CTB) a tene vários seminario edukashonal pa merkado di San Francisco i Los Angeles, California, enfokando riba Kòrsou komo destinashon turístiko. E motibu ku CTB a skohe pa bai bèk California ta basá riba e fluho di turistanan ku nos ta risibiendo for di e aria aki. Por nota un kresementu den esaki e último periodo. E bishita na California a konsistí di entre otro seminario pa agensianan di biahe na San Francisco i Los Angeles i tambe seminario pa prensa/media di San Francisco i di Los Angeles. Tambe a organisá un ‘roadshow’ na kosta west. Srta. Natasha Chatlein, Kònsel General di Hulanda na San Francisco tambe tabata presente na e seminario na San Francisco. E seminarionan a tuma lugá den regionnan spesífiko kaminda agensianan di biahe renombrá ta situá. Asina por hasi menshon ku e seminarionan a tuma lugá na tantu; Burlingame i Burbank ku presensia di aproksimadamente 65 agensia di biahe pa evento. Durante kada seminario CTB a duna un presentashon di Kòrsou brindando e agensianan di biahe un bista amplio di nos isla, atrakshonnan nobo, promoshonnan i eventonan. Banda di e seminarionan pa ‘showcase’ Kòrsou a tene tambe 3 evento pa miembronan di prensa di California di kual e promé a wòrdu tene na San Francisco kaminda miembronan di prensa di San Francisco Chronicle, AFAR Magazine, Fodors, Huffington Pose, Forbes i Urban Daddy a partisipá. E di 2 i di 3 evento pa miembronan di prensa a wòrdu tene na Los Angeles. Entre esnan ku a asistí e evento pa prensa tabatin miembronan di media di Smarter Travel, MTV Travel, Caribbean Travel, About.com, Expedia View Finder, Matador TV, Washington Times i LA Times. 
Kòrsou por ta orguyoso di por tabatin 4 dia di seminario eksitoso tras di lomba na California. Un biaha mas CTB a sá di krea e oportunidat perfekto pa rekonfirmá Kòrsou su balor agregá komo destinashon karibense den merkado di turismo internashonal i tambe desaroyá relashon di negoshi ku partnernan nobo. Ademas di esaki a brinda tur agensia di biahe partisipante e oportunidat di sera konosí ku nos isla su tesoronan skondí. Un danki ta bai na e partnernan ku a forma parti di e eventonan: Classic Vacations, Apple Vacations, Copa Airlines, Sunscape Curaçao Resort, Spa & Casino ku a kompaña CTB na tur e seminarionan, ACOYA Curaçao, Blue Bay Curaçao, Hilton Curaçao i Renaissance Curaçao Resort & Casino, ku a partisipá na un òf mas di e seminarionan.