WILLEMSTAD – 28 ougùstùs 2015  – Djabièrnè último Ofisina di Turismo di Kòrsou (CTB) huntu ku JCI United Citizens of Curaçao a organisá un anochi festivo di manera ku por a hasi entrega di sertifikado na partisipantenan di e proyekto; The Golden Voice of Tourism Youth Congress.

Despues di tres siman largu i eksitoso e fase di preparashon a yega su final. Durante e periodo aki e hóben a risibí diferente tep balioso entre otro kon pa hasi un presentashon dilanti públiko i kon pa aktua durante un diskushon di panel. Despues di a sigui e diferente kurso i tayernan, awor e hóbennan ta kla pa kuminsá ku e kompetensha di diskurso.

Netamente pa esaki nan a risibí algun tayer ku a trata e mesun tópiko nan ku ta bai uza durante e kompetensha. Di e manera aki por a amplia nan konosementu i alabes ta bon prepará pa e siguiente etapa di e proyekto.

E fase preparativo a wòrdu realisá danki na koperashon di tur orador i trainer ku a duna un man pa prepará kada un di e hóbennan. Nos ta rèfri na sra. Shanny Sommer, sr. Elton Villareal, sr. Paul Stokkerman, sr. Dino Daal, i tambe sr. Edward Suares.

Otro siman djaluna 31 di ougùstùs, djamars promé di sèptèmber, i tambe djarason 2 di sèptèmber La Tentashon ta bai ta e sitio prinsipal kaminda partisipantenan lo kompetí kontra di otro den diferente buèlta te na momentu ku saka un ganador. E ganador apsoluto ta bira embahador di turismo di Kòrsou i lo representá nos pais na e Caribbean Tourism Youth Congress dia 23 di òktober próksimo.

Pa mas informashon por bishitá www.facebook.com/uccuracao òf www.facebook.com/Dushihende. Por manda un mail tambe na goldenvoicetourism@gmail.com.