WILLEMSTAD- 25 di yüni 2014: Resientemente a tuma lugá na Hulanda e ‘Young Travel Talent Award’. Ofisina di Turismo di Kòrsou (CTB) su ofisina na Europa (CTBE) tambe a sostené e award aki.  Srta. Inge van den Akker a resultá e ganador di e ‘Travelution Young Travel Talent Award 2014’ i Sr. Erik Spliet a keda na di dos lugá den e kompetensia. Tur dos a bishita Kòrsou na aprel 2014 kaminda nan a haña e tarea pa diseñá un plan pa yuda oumentá e montante ku e turista ta gasta pa dia riba nos isla.  E otro 4 partisipantenan a bishitá Malasia i Turkia. E kalidatnan komunikativo i komersial fuerte ta loke a konvensé e huradonan ku Inge i Erik tabata esnan ku a meresé e premio. Ofisina di Turismo di Kòrsou (CTB) ta haña importante pa invertí den proyektonan pa talentonan hóben. Asina por menshoná ku den luna di mart CTB a organisá un siman di Masterclasses na Kòrsou pa 15 studiante talentoso di MBO bou di e nòmber ‘Reiswerk Topclass’. Srta. Inge su plan pa yuda oumentá e montante ku e turista ta gasta pa dia riba nos isla a konsentrá riba e konsepto di ‘Pop up’ kual ta enserá ku na diferente lokashon riba nos isla ta introdusí un sistema kaminda ta bini ku un restorant òf tienda temporal pa asina bende produkto di un manera kreativo. E manera aki lo stimulá pa e turista kumpra mas ora e ta riba nos isla dor ku kaminda e presentá e tin e oportunidat di kome algu òf kumpra algu sin ku nesesariamente e ta den un aria komersial. Lo bai analisá e plan ku e hóben a presentá pa wak di ki manera lo por implementá e sistema aki na Kòrsou. CTB ta kere den kultivá, konserva i sostené talentonan hóben den e industria di turismo. Ta e hóbennan aki lo ta e futuro koleganan den merkado turístiko ku lo ta di vital importansia pa kresementu positivo den e industria turístiko. E revista di biahe hulandes ‘Travelution’ a kuminsá ku e premiashon di talento hóben den sektor turístiko for di 2010 huntu ku tres Ofisina di Turismo. E pènel di hurado ku a husga e kompetensia a konsistí di: Sr. Edward Suares (CTBE), Zuraini Ghani (representante di Ofisina di Turismo di Malasia), Nese Akdogan (representante di Ofisina di Turismo di Turkia), Frank Oostdam (Direktor di Algemene Nederlandse Vereniging van Reisondernemingen), John Flierman (representante di ROC Amsterdam i ROC Flevoland), Bauke Boogers (ganador di Young Talent 2012) i Henkjan Smits (trainer i coach di talento). CTB ta orguyoso di por a sostené e ‘Young Travel Talent Award 2014’.