WILLEMSTAD- 22 di sèptèmber 2014:- Ofisina di Turismo di Kòrsou (CTB) resientemente a entrega 4 baiskel na Bike Team di Kuerpo Polisial Kòrsou. E entrega di e baiskelnan a tuma lugá for di man di Minister Palm enkargá ku desaroyo ekonómiko pa Minister Navarro responsabel pa e kartera di hustisia bou di kua e Bike Team di Kuerpo Polisial Kòrsou ta kai. E polisnan di Bike Team ta yuda ku e parti di supervishon den sentro di siudat spesialmente ora ku tin barkunan krusero. Na momento ku tin barku krusero den nos haf ta un gran kantidat di turista ta baha for di barku pa asina konosé nos sentro di siudat. Ta importante pa nos sòru pa e seguridat di e turistanan aki. E kontribushon di parti di CTB den forma di material na Bike Team ta forma parti di e koperashon ku resientemente a yega na dje esta ku Bike Team lo bai sostené Politur. Den kuadro di e plan di seguridat proponé pa e temporada haltu di turismo ku ta bai kuminsá, ta esensial ku Bike Team tin sufisiente material den bon estado, di manera ku por duna un aporte signifikativo na e parti di seguridat di nos bishitantenan.