Kòrsou a forma parti di AVAVIT 2013
WILLEMSTAD- 28 di Mei-2013:- Ofisina di Turismo (CTB) ta kontentu di un biaha mas por a forma parti di un tim pa promové Kòrsou, e biaha aki esaki tabata na okashon di e Feria Turístiko AVAVIT 2013, ku a tuma lugar resientemente na Caracas, Venezuela. CTB huntu ku sektor privá i diferente hotèl na Kòrsou a forma un ekipo sólido pa promové nos isla komo destinashon den Karibe.
AVAVIT 2013 ta un eksposishon ku anualmente ta keda organisá dor di Asociación Venezolana de Agencias de Viajes y Turismo (AVAVIT). Durante di e eksposishon ku a tuma lugar entre 23 i 25 di Mei último, por a konta ku 74 booth di kual unu tabata di Kòrsou. AVAVIT ta un eksposishon na unda ku ta presentá un gran variedat di servisio i produktonan turístiko, e.o hotèlnan, agensianan di biahe, ofisina nan di turismo di kada isla òf país partisipante, transporte pa turista i otro servisionan ku tin influensia riba e biahe, estadia òf eksperensia di e turista. Tabata tin oportunidat di nètwèrk ku ehekutivonan; por menshoná tambe ku tabata tin one-on-one meetings, diferente workshop i tópikonan di interes pa agensianan di biahe.
Dia 23 i 24 di Mei AVAVIT tabata habrí eksklusivamente pa profeshonalnan i ehekutivonan di turismo miéntras ku públiko por a bishitá e eksposishon dia 25 di Mei. “Esaki ta e oportunidatnan ku nos ta ‘gara’ ku dos man, tabata un momentu di hopi impakto pa promoshon di Kòrsou. AVAVIT ta anualmente un punto di enkuentro pa ehekutivonan i partnernan den industria turístiko for di henter nos region. A probechá un biaha mas pa posishoná Kòrsou komo un destinashon faborito den Karibe i di estrechá lasonan ku lo por ta benefisioso den futuro. Nos ta felisitá tur nos partnernan ku a forma parti di “Team Curaçao”; un gran esfuerso na bienestar di industria turístiko di nos pais”, esaki di akuerdo ku Sr. Ghatim Kabbara, direktor di CTB. Tabata Renaissance Curaçao Resort & Casino, Marriott Curaçao Beach Resort & Emerald Casino, Hilton Curaçao Hotel, Santa Barbara Beach Resort, Livingstone Jan Thiel Resort, Sunscape Curaçao Resort, Spa & Casino, Otrobanda Hotel & Casino, Destination Curaçao, Piscadera Harbour i aerolinea Insel Air tur a kontribuí pa por a realisá e partisipashon importante na AVAVIT 2013.