‘Thank You’ ALKALI Esemble: 

WILLEMSTAD- 31 di mei 2013:- Orkesta hubenil ALKALI Esemble ta di bishita na Kòrsou pa un interkambio kultural. For di dia 21 di Mei te ku dia 31 di Mei e grupo konsistiendo di 14 hóben a tene vários konsierto riba nos isla, introdusiendo nos hendenan na otro tipo di músika. E programa edukativo pa e orkesta estudiantil a keda hinká den otro ku e meta pa promové diversidat i krea konsiensia riba desaroyo kultural serando e buraku entre músika klásiko i esun popular. Na Kòrsou nan tarea tabata pa mentor e orkesta ‘New Gen Orchestra’ bou direkshon di e Maestro Victore Mario Sosa. Durante di 2 siman nan a bishitá 14 skol lokal, tambe a duna presentashon na Bon Futuro, SGR-Groep, Scouting Antiano, diferente kas di kuido i programanan edukativo pa hóben. Komo muestra di apresio Ofisina di Turismo di Kòrsou (CTB) i  CTB su ofisina na Merka a hasi un gesto na ALKALI Esemble gradisiendo e grupo pa e presentashonnan regalá na e pueblo di Kòrsou. E mihó manera pa kompletá nan eksperensia na Kòrsou ta ku un rekorido riba nos isla, bishitando sitionan históriko i di gran impakto turístiko. Tabata despues di e dianan di presentashon ku ALKALI Esemble riba invitashon di CTB a disfrutá di e ‘tour’ riba nos isla pa asina sera konosí mas di aserka ku tur loke Kòrsou tin pa ofresé komo un destinashon turístiko. Na final di e ‘tour’ e grupo por a sinta trankil i interkambiá di idea disfrutando di un delisioso plato krioyo. Ofisina di Turismo di Kòrsou i CTB su ofisina na Merka a gradisí ALKALI Esemble na nòmber di nos komunidat pa nan gesto musikal. Ofisina di Turismo di Kòrsou ta gradisí Touraçao ku a sòru pa e ‘tour’ pa ALKALI Esemble.

 *Riba foto athuntu por haña un impreshon di e hóbennan músiko durante di nan bishita na Kòrsou.