WILLEMSTAD- Entrante 23 di desèmber e proyekto di Internet grátis pa sentro di siudat a bira un realidat. E proyekto ta bou di kordinashon di Ofisina di Turismo di Kòrsou (CTB). Minister di Desaroyo Ekonómiko sr. Stanley Palm a desvelá na pia di brùg parti di Otrobanda un bòrchi pa indiká ku desde awor nos sentro di siudat tin WIFI grátis. Internet a bira un parti importante di nos bida, tambe ora nos ta ku vakashon. E turista di awendia kier ta tur kaminda aksesibel, tin akseso direkto na e último notisia na e momentu ku esaki sosodé i e ke por hasi uso di medionan sosial tur momentu di dia. Komo destinashon turístiko Kòrsou no por keda tras i mester aportá na e kambio di komportashon di e turista di awendia. Nos sentro di siudat ta keda konsiderá komo un di e atrakshonnan turístiko mas popular di nos isla. E echo ku ta bai ofresé Internet grátis den e aria aki lo por keda konsiderá komo un servisio ku nos destinashon ta brinda na e turista ku ta di bishita serka nos. E turista krusero lo ta esun ku mas lo benefisiá for di esaki. E turista ku ta di bishita den nos sentro di siudat lo por saka potrèt mesora asina e baha for di barku i den un par di sekònde manda esaki pa tur su famianan i amigunan riba medionan sosial indikando ku e la yega Kòrsou. Esaki sigur ta yuda den e esfuersonan pa hasi nos pais mas konosí i asina atraé bishitantenan nobo. CTB kier gradisí UTS pa e apoyo tékniko pa por a hasi introdukshon di WIFI grátis den nos sentro di siudat posibel. E sistema lo bai ta di tal manera hinká den otro ku pa por tin akseso na Internet e turista mester yena un enkuesta kòrtiku promé. Esaki ta duna CTB e oportunidat pa por kolekta algun dato di e turista ku sigur ta sirbi pa asina formulá kampañanan dirigí riba e nesesidat di e turista. CTB ta sumamente kontentu di por ofresé e sistema di WIFI den nos sentro di siudat ku sigur lo benefisiá nos turismo krusero, di estadia i tambe nos hendenan lokal.